قونویا ایزنینیزله اوچ محورده باخماغی دوشونورم:
-ایران تورکلری
-آذربایجان میللی حرکاتی
-کوردوستان حرکاتی و آذربایجان میللی حرکاتی ایله اولونان قیاسلار
-ایران تورکلری حاققیندا دانیشدیغیمیزدا خوراسان تورکلری، تورکمنلر، تهران تورکلری، آذربایجانلی‌لار، قاشقایی‌لار، خلج‌لر هابئله گونئی بولگلرینده یاشایان تورکلری قاپسایان بیر سوز اولدوغونا گوره آذربایجان میللی حرکاتی ایله علاقه‌سینه باخمایاراق، آچیقلاماق لازیمدیر کی، کوردلر ایللر بویو فرقلی و قانلی حرکاتلا نهایتا ایران جغرافیاسینا قارشی کوردوستان جغرافیاسین قویماغی باشاریب آمما ایللردی ایران تورکلری بو جغرافیا ساواشین اودوزوب حتتی میللی حرکاتین دا اونون کسیب. ائتنیک جغرافیا ایله ائشیت دئییل، ایران جغرافیاسینا گونئی آذربایجان دنگ اولا بیلر نئجه‌کی کوردوستان دنگ اولوب کورد یوخ.
سوزو گئدن قونویا گوره بیر چوخ آدلاری دئمک اولسادا تکجه ایکی آدلا سوزو ایره‌لی آپاراق: اکبر عبدی و پرویز پرستویی. بونلاری نوید محمدزاده و قطب‌الدین صادقی ایله قیاس ائدنده بعضی جاوابلار ایسته‌مه‌دن بئیینه گلیر.
بو ایکی شخص هرهانسی کورد تشکیلاتلارینین رسمی اویه‌سی اولماسالار دا، هنری و شخصی حایاتلاریندا کیملیکلری ایله یوردلارینین کوردوستان اولدوغونو بلیرمیشلر هابئله سایا گلمز قدر کولتورلری و خالقلاری اوچون چالیشیبلار.
آما او سوزده تورک اولانلار ایسه بو گونه‌دک گونئی آذربایجانا (کی آدینی بئله ائشیتمه‌ییبلر) دئییل ده ایران تورکلرینین تئاتر و سینماسی اوچون هانسی قاتقیدا بولونوبلار؟
کوردلرین یاشادیغی شهرلرده اولان مسئوللارین باخیشی «ایران کوردلری» یئرینه «کوردوستان» اولدوغوندان دولایی اللریندن گله‌نی اسیرگه‌میرلر، هه یئری گلدیکده «من ایرانلییام هم ده ان اصیل و اسکیلریندن» دئییرلر کی، میخی چالیب آماجا وارسینلار و آماج کوردوستانا خیدمتدیر. ساییسیز تئاتر فئستیواللاری دا بورادان قایناقلانیر.
قارشی طرفده دوشونجه ایران تورکلری اولدوغونا گوره تورکلره حتتی گونئی آذربایجانا دئییل ده ایران تئاتر و سینماسینا گوردوکلری ایشلر و قاتقیلارینی سانکی تورک و کولتورو اوچون گورموش کیمی دوشونوب سونورلار. بو آرادا آذربایجان میللی حرکاتی نه ائده بیلر کی؟
اورنک اولاراق «قیزیل جام» فئستیوالین یولا سالانلارین دوشونجه‌سی ایران تورکلرینه یاخیندیر یوخسا گونئی آذربایجان‌می؟ زیویه فئستیوالینین ایکی داورینین عراق قوزئیندن اولدوغونا باخمایاراق قیزیل جام فئستیوالینین قوروجولاری حاکمییتین قارشی گلیب/گلمه‌مه‌سینی دوشونمه‌دن قوزئی آذربایجاندان داور گتیرمه‌نی دوشونوبلر؟! حرکت اونلاری هده-قورخو ایله بو ایشه زورلامالی ایدی؟!
-آذربایجان میللی حرکاتی حاققیندا یازیلان تنقیدی باخیش اونو داها دا گوجلندیریب ایره‌لی آپارا بیلر آنجاق ایلک اولاراق نمنه‌دن؟ کیمدن؟ الینده نه وار؟ بیز اونا نلر ائتمیشیک؟ و باشقا سورولاری دا دوشونمه‌لییک یوخسا یوخ؟
بو حرکات هارداسا ۳۰-۳۵ ایل اول آذربایجان میللی حکومتینین گنجلرینین باشلاتدیغی حرکاتدیر (بوتون آذربایجان خالقی اونا سس وئرمه‌دیگی فرقه‌نین میللی حکومت اولماماسینا ندن ساییلماز).
آنا دیلی و باسیلمیش حاقلاری الده ائتمک آماجی ایله یولا چیخمیش اولسالار دا بو گونه‌دک بوتون اجتماعی و تشکیلاتی حرکتلر کیمی باشاری و آخسارلیقلاری اولوب. آمما آذربایجان میللی حرکاتین وارلیغینا دا باخیب ائتمه‌دیگی ایشلری یارغیلاییب، قیناماق داها یاخشی اولمازمی؟! دئیه دوشونورم.
نه ایسه بو گونه‌دک اقتداردا اولان سیاسی حاکمییت طرفیندن اولان باسقیلار و هابئله آیری‌سئچکیلیکلره باخمایاراق آیاقدا دوروب بوتون باشاریلاری و آخسارلیقلاری ایله، بیر چوخ فعاللارین توتوقلانیب اوزون موددتلی حبس آلماسی، یوز ایللیک یارادیلمیش هده-قورخولاردان (پانتورک، تجزیه طلب، اقدام علیه امنیت ملی و باشقا) دولایی هابئله تلویزیا مدیانین آپاردیغی تبلیغاتلار سونوجوندا دینج اهالینین و سیویل توپلومون میللی حرکاتدان آرالی گزمه‌سی قاچیریلمازدیر هله کی سئچکینلر.
-کوردوستان حرکاتی و اصلینده کورد ترور تشکیلاتلاری ایله (حدکا، کومله، پژاک و پ‌ک‌ک) آذربایجان میللی حرکاتین قیاسلاما بیر نئچه سببدن دولایی یانلیشدیر و نه یازیق کی فرقلی زامانلاردا فرقلی شخصلر طرفیندن بو قیاسلاما باش وئریب.
-یاشام طرزی
-نفوس ساییسی
-مذهب فاکتورو
-قورولوش فلسفه‌سی
-تشکیلاتلارین باخیشی و اولوشو
-گلوبال گوجلرین موناسیبتی
-اقتداردا اولان حاکمییتین موناسیبتی و باشقا.
ایکی خالقین یاشام طرزی چوخ اسکی چاغلاردا یاخین اولسایدی دا تورک‌لرین خاقانلیق و شاهلیق قوردوقلاریندان دولایی آرتیق شهرلرده یئرلشمه‌سی سونوجوندا طایفاچیلیق و عشیره‌چیلیک آرادان گئدیب یاخود ان آزیندان چوخ آزالیب (آزینلیقدا اولان کوچری طایفالار خاریج)، آمما قارشی طرفده بو عادت عنعنه و یاشام طرزی هله ده دوام ائتمکده‌دیر
(مراد مریدی موناسیبتلر، آغ ساققال و عشیره باشی سؤزه باخماق داها منسجم گورونتویه سبب اولور)
کورد آدلانان توپلوم هارداسا ایران جغرافیاسیندا ۸ میلیونا یاخین جمعیتدن اولوشور حال بو کی، سادجه آذربایجان ۱۲-۱۵ میلیونا یاخین نفوسا صاحیبدیر و بو چوخونلوق بیرلیگی آزالدیب فیکیر و باخیش آیریمجیلیغین ایستر ایسته‌مز چوخالدیر.
کورد آدلانان توپلومون یوغون بولومو سوننو اولدوغوندان دولایی اوزون ایللردن بری اقتداردا اولان حاکمیت ایله زاویه‌سی اولوب و موجادیله آپاریب ایستر خاقان‌لار ایستر ایسه دولت-ملت قورولوشوندان بری، بونا گوره ده مرکز-پیرامون قونوسو و توپراق مسئله‌سی اونلارین ایلیگینه قدر ایشله‌ییب و آرتیق مانیفسته دونوشوبدور. کئچمیشده و هله ده باخاندادا حاکمییته قارشی اولانلار هابئله سول دوشونجه‌سینده اولانلار کورد توپلومو ایله یاخینلیق قورا بیلیبلر و قورماقدادیرلار.
کورد تشکیلاتلارینین قورولوش و آیاقدا دورما فلسفه‌سی تمامیله آذربایجان میللی حرکاتلا فرقلیدیر. مشروطه، خیابانی و میللی حکومتی گورمزدن گلرسک میللی حرکات آنا دیلی و باسیلمیش حاقلاری ایران آدلانان جغرافیادا الده ائتمک آماجی ایله باشلانمیش آمما تام ترسینه کورد حرکاتی ایلک گوندن بری اله سیلاح آلماقلا حاکمیتتله ساواشیب و بیر چوخ زامان دینج اهالیه سالدیریب سویقیریم یاپماقلا کورد خالقینین موستقیل اولماسینا و کوردوستان یاراتماغا چالیشیبدیر. همین رادیکال دوشونجه و داورانیشلار میللی حرکاتدا اولمادان بونجا یارغیلاما قیناما لاغا قویمالار وار، هله بیرده سیلاحلی قولو اولسایدی بیر چوخلاری فرقه زامانی کیمی مئنبره چیخیب «بونلار آللاهسیز کمونیستدیر» دئینلرین سوزون اینانیب دا فرقه‌چیلری قیردیقلاری کیمی میللی فعاللاری یئر اوزوندن سیلردی!
میللی حرکاتین باخیش آچیسی آذربایجان خالقینین دوغال و قانونی حاقلارینی الده ائتمک آماجی ایله چالیشیر و طبیعی کی بو گونه‌دک تماما مدنی و سیاسی اولاراق چالیشیب بونون ثبوتو بیر چوخ درنک، ژورنال، وارلیق کیمی ادبی و سیاسی ایشلردیر.
قارشی طرف ایسه بیرینجی گوندن بری سیاسی چالیشماقلا یاناشی سیلاحلی قول اولوشدورماقلا فرقلی یولا آددیم آتیب، توپراق ایدعاسی و بیر چوخ گلوبال گوجلرله فرقلی یئرلرده ایش بیرلیگینده اولماقلا، قاراباغ‌دان توت تا سوریه و عراق و باشقا اولکه‌لرده (تام بیر نیظامی پیمانکار کیمی) همین سیلاحلی قوللارین گلوبال گوجلرله ایش بیرلیگینده اولماقدان باشقا گورولری «گروه فشار» قابلییتیدیر، بئله‌کی هارداسا هانسیسا کورد بونلارین ایسته‌دیگی یونده حرکت ائتمه‌سه (جاش دئییلن شخصلر) راحاتلیقلا ترور و حذف اولور، همین حرکتین تایین آذربایجان میللی حرکاتیندا اورنک گتیرمک اولارمی؟!
سوز قونوسو اولان تئاتر و سینما قونوسونا گلنده، عراغین قوزئینه اولان باخیش قوزئی آذربایجانا اولان باخیشلا عینیدیر؟ دولتی و سیاسی موناسیبتلر نئجه؟
گلوبال گوجلر هابئله اقتداردا اولان حاکمییت یوخاریدا گلن فرقلره گوره همین تشکیلاتلارا بیر نیظامی پیمانکار کیمی باخیبدا اونلاری یئری گلنده یاراقلاندیریب قورشاییب (تورکه قارشی) سیلاحلاندیرمیش (گوندم و مدرن سیلاحلارلا) و یئری گلنده استقلال سوزو گئدنده آرخالارین بوشالدمیش. ۱۳۵۷ دئوریمینده اقتدارا چاتانلار و حدکا آراسیندا گئدن دانیشما آنلاشمالارا باخیلیرسا گورونور کی بیرینجی گوندن بری امتیاز وئرمه‌یی دوشونورموش حاکمییت! همین معامله شریعتمداری و خلق مسلمان ایله باشقا جور اولوندو!
ایللر بویو فرقلی دولتلرله ایش بیرلیگینده اولوب، تشکیلاتلیق تجروبه ان آزیندان آذربایجان میللی حرکاتین ایکی قاتی اولان و دونیانین دسته‌یی دالینجا اولان کورد و تشکیلاتلاری ندن و نییه آذربایجانلی و آذربایجان میللی حرکاتی ایله ائشیت اولا بیلر؟
