دینله منی،
"يانیق کرم" سسی يم،
اۇجا اۇچان،
قارتاللارین هوسی.
کاماندا اوْخام،
چکیلمیشم دارا من.!
***
دینله منی،
آشیقلارین دیلینده،
کامانچی يام،
تارام،
قوْپوز سسی يم.
***
دینله منی،
داغدان آخان اوْدام من!
آتیلمامیش،
قێندا قالان اوْخام من
آزربايجان،
مۆلک سوْلیمانام من.
***
دینله منی،
چوْخ يارالار واریمدی
داغدان آخان،
اوْدلارمنیم قانیمدی
پۆسگوررم،
ياندیرارام،
ياخارام.
***
دینله منی،
ستارخانام،
بابکم.
قوْچاق نبی،
خان چوْبانام "سارا"سێز.!
***
دینله منی،
تار سیمینده،
دئيلمه‌میش بیر سؤزم
قارانفیلم،
قارا قاشلی بیر گؤزم.
***
دینله منی،
قاراباغام، قانلیيام
اۆز ائلیمه،
اۆز دیلیمه باغليیام.
***
دینله منی،
کۆهنه سازین سیمینده
اوْغلو اؤلن قادین لارین دیلینده
چال بۇ سازی،
قوْي دئيیلیم، يايلانیم
آخیم گلیم،
سئل تکین من پايلانیم.
#ماحموددالغا
