عزیز آزربایجان میللتی:
بیز آزربایجان میللی حرکاتینا منصوب اولان یئنی یئتمه و گنج لردن متشکّل بیر اوخور-یازار جمعیّت اولاراق کئچن ایلدن بئری آچیق سؤز آدلی مستقل دئرگی ایله برابر میللی حرکاتیمیزدا کولتورل(فرهنگی) فعالیته باشلامیشیق.
بیز هئچ بیر اؤزل تشکیلات و یا مدیایا دوغرودان باغلی اولماماقلا بیرلیکده،هئچ بیر شخصی چیخار و منفعت گودمه دن بیر نئچه قوتسال و مقدس هدف اوچون میدان گئلمه یه چالیشدیق؛آنجاق بیر پارا سورونلارلا قارشی-قارشیا قالیب بیر سوره لیینه فعالیتیمیزی دوردورماق مجبوریتینده قالدیق.
هدف لریمیز:
ایلک و أن اؤنملی هدفیمیز،آزربایجانیمیزین یئنی نسلینی(اؤنجه لیکله یئنی یئتمه لر) میللی حرکاتیمیز ایله تانیش ائتمک،باریشدیرماق و میللی-مدنی فعالیته چاغری دا اولوب و فعالیته دعوت ائتمکدیر.
هربیر آزربایجانلی وطن پرور بونو بیلمکده دیر کی گونوموزده کی مدیا چاغیدیر، داخلی و خارجی فارس مدیالاری 24ساعات چالیشیب و بیزیم گنج لریمیزی میللی حس لریندن قوپاردیب و اؤز کولتوروموز و میللی حقوق و معنویاتیمیزدان بیگانه ائتمکده دیرلر.
بو هجوما قارشی بیز فعال گنج لر اؤز یاشیتلاریمیزلا بیرله شیب و دیم دیک آیاقدا دوروب بو آخینا دور دئمه لییک و بونو ایلک اؤزوموزدن باشلامالییق.
سپر ائت گؤوده نی دورسون بو حیاسیزجا آخین(م.عاکف أرسوی)
ایکینجی اولاراق بیز میللی حرکات ایچینده فرقلی جناح لار و تشکیلات لارین اولوشماسینی بیر ضعف دئیل بیر قوّت نقطه سی گؤروب و بوتون طرفلر و جناح لارین اختلاف لارینا رغماً بیرلیکده و واحد بیر هدف اوچون حرکت ائتمکلرینی تمنّی ائدیب و میللی باریشیق و میللی اتحّاد اوچون گئدن یولدا بیر کؤرپو اولماق ایسته یینده اولموشوق و هر زمان جناح لار آراسی آنلاشمازسیزلیق دان اوزولوب رنجیده اولموشوق.
مشکلات و سورونلار:
بیز هئچ بیر جناح یا تشکیلاتا اؤنجه لیک تانیمادان نشریه میزین هر سایینی بوتون میللی ساحه ده فعالیت گؤسترن مدیا و تشکیلات لار ایله پایلاشدیق آنجاق بعضی مدیالار طرفیندن حمایت آلاراق بعضی لر طرفیندن گؤرمزدن گئلدیک و هدف قویدوغوموز میللتیمیزین هر قشریندن اوخویوجو کیتله سینه یئتیشمکده زورلاندیق.
اوچونجو اولاراق دا بیر مستقل نشریه اولاراقدان امنیتی مسئله لرله اوز اوزه قالیب و مرجک آلتینا گیردیک.
ایندی ایسه آچیق سؤز فعال لاری اولاراق آذوح تشکیلاتینین هر زامانکی یوجه حمایتیندن منّتدارلیغیمیزی بیلدیریب و "آزاد آزربایجان" آدلی میللی دئرگی نین فعالیته باشلادیغینی تبریکله ییب و بوندان سونرا بو درگی نین بیر پارچاسی اولاجاغیمیزین غرورونو یاشاییریق.
Z نسلی"نین 1مهر موناسیبتینه بیر نئچه نیسگیللی سؤزو:
دونیا نین باشا باشیندا مدرسه لرین آچیلیشی بیر موبارک گوندور؛هر اؤیرنجی باشقا بیر شوق ایله یئنی تحصیل ایلینه گیریب و گئله جک و آتیه سینین تئمل لرینی شکیللندیرمک اوچون اؤز آنا دیلینده درس لره باشلار؛آنجاق گونئی آزربایجان تورک میللتینه بو گون چوخ دا موبارک ساییلماز!!!
بونون دلیلی نه دیر دییه سوروشسانیز
بئله جواب وئرمک اولار کی:
بیزیم سؤمورگه(مستعمره)کیمی یاشادیغیمیز بو اؤلکه ده مکتب لرین آچیلیشی ایلک مکتب(اوّل ابتدائی)اؤیرنجی لرینین بیرینجی دفعه اولاراق اجباری شکیلده بیر یابانچی دیلده درسه باشلاییب و اؤز آنا دیل لریندن قوپارتیلماسی نین ایلک گونو و آسیمیلاسیون سیستمینه داخل ائدیلمه لرینین ایلک رسمی مرحله سی دیر.
ایلک مرحله بوردان باشلاییب گئله جک ایللرده ایسه تحریف اولونموش تاریخ، ادبیّات و ساختا بیر کیملیک اوشاقلاراریمیزا تحمیل اولوب و فاشیزمه قوربان گئده جک بو معصوم بالالار.
نه یازیق کی بیز والدین لر ده بونا بویون ائییب و سوساجاییق.
نه یامان نیسگیل دیر بو نیسگیل!!!!
آزادلیق
عدالت
میللی حؤکومت
