1
سینیف ده اولدوغومدان سیخیلیردیم. هر آن قولاغیم اوخول زنگینین چالینماسینی دینله ییردی. ندن سه ایلک اولاراق تاپشیریغی یئرینه یئتیردیگیم اوچون اؤیرتمن دن 20 نومره سین قازانمیشدیم. اونو ، آناما آپارمالی اؤدول کیمی سانیردیم. واخت بیته رک، چانتام زنگین چالینماسیندان اؤنجه، کوره ییمده ایکن دورمادان ائومیزه دوغرو قاچدیم.
اؤدول واراغی الیمده ، قاپی نی تئز-تئز دؤیوب ، ایل لرجه گؤزوم قاپیدا قالان کیمی یالنیز آنامی گؤرمک ایسته ییردیم. قاپی آچیلارکن هؤوله سک سلامی دا اونودوب واراغی قاباغیما توتوب
- آنا – آنا 20 آلمیشام ، سؤیله دیم
آفرین – آفرین دئییب باغرینا باسدی. گلیب ایکی چای ایله اوتاغا کئچیب سؤیله دی : ماشالله بالام ، همشه بئله ...
سؤزو بیتمه دن دئدیم : سینیف ده ان چابالی اؤیرنجی یم. او اوزدن 20 آلمیشام و آلاجاغام.
بیردن قاییدیب دئدی: " جوجه نی پاییزین آخیریندا سایارلار"{2} .
بو سؤزو ائشیده رک فیکره دالدیم. بئینیمده کی یارانان فیکیر سیگناللاری بیر-بیرینه ده یرک سونوج چیخیش فرکانسی بئیله اولدو. _پاییزین سونونا بیر زاد قالمیر_
گونلرین اؤتمه سیندن سئوینه رک، دال با دال 20 واراقلارینی اوست – اوسته ییغیرام.
پاییز بیتدی. آنجاق یئنه ده هامان سؤزون تیکرار اولدوغوندان آز قالدی آغلیم باشیمدان چاشا. سون دؤنه بئله ساندیم _آتداکی ایلین حتما پاییزین دئییر_
آی لار اؤته رک ، ایلک سینیفی گئری ده قویوب ایکینجی سینیفه آیاق قویدوم. یئنه پاییز فصلی ، یئنه هامان 20 واراقلاری. ایلک واراغی آپاریب ، بیر ایل تیکرارلانان "جوجه نی پاییزین آخیریندا سایارلار" سؤزونون ، باشلانغیجینی آنام دئمه دن ، سونونو "سایارلار" دئدیم.
گونو – گوندن قاچماق دویغولاریم اوچاراق، دای واراقلاری چانتاما قویوردوم، نییه کی آنامین سؤزون ازبرله میشدیم. پاییزین سونا چاتماغین و هانسی پاییز اولماغین بئینیمده سیغیشدیرا بیلمیردیم کی آنام آی لارلا توپلادیغیم جوجه لری ، سانایا.
2
اوخولا گئتمه دن اؤنجه قاری ننه م {3} الیمی – الینین ایچینه قویوب ، باش بارماغیمدان باشلایاراق جولو بارماغیما دک دوزه نلیش اولونموش بو سؤزلری ایفاده ائدردی: "بیری توتدو- بیر سویدو- بیری دوغرادی- بیری بیشیردی – بیری یئدی"
سونرا الیمین اورتاسیندان چیمدیکله یه رک {4} گولومسه ییب دییردی : "جولو-جولویه نه قالدی"
3
بو گون او ایکی اوشاقلیق آنی لاریمدان آلدیغیم یانیت(جواب) بئیله اولور: یای ین سون آیی ، زومار آیی دیر. او آیدادیر کی ، اکیندن ، باغ- باغات دان و... توپلانان لاری پاییز ایله قیش گونلرینه کئچمیش ده زومار ائده رمیش لر. او زومارلیق لاردان دا بیری سی بالاجا جوجه لر یمیش . بس او حئساب لار " جوجه نی پاییزین آخیریندا سایارلار" دئییردی آنام. یانی جوجه نی کیمی سی توتوب ، سویوب ، دوغراییب ، بیشیریب و سونوندا کیمی سی یئمه سه یمیش و یا لی وورماسایدی ، پاییزین سونونا دک بؤیویوب ، تویوق-بئچه اولاراق، زومارلیق دا ساییلا بیلرمیش.
4
بو گون آذربایجان ین طالعی ده او ایکی آتا-بابا سؤزلرینه بنزه ییر .آذربایجانلی لار اؤز میللی وارلیقلارینا او گونه دک کی میللی دوشونجه ایله دالماییب لار، گؤزلری اؤنونده "کیمی سی توتوب" و "کیمی سی یئییب" مرحله سین گئری ده قویاراق سونوجدا "جولو-جولویه نه قالدی" اوینونو، اوینایا جاقلار.
نییه کی شوونیزم زومارلیق لارین ساناماغین گلجک نسل لر الی ایله بیر کابوس اولاراق دوشونوب و بو اوزدن بوتون واریقلاری تالیب – تالان ائده رک ، تورک کؤکه نلی گلجک نسل لر اوچون آذربایجانلی لار الی ایله و توپراق وئرگی سی ایله توپلانی لان زومارلیق لاری او جومله دن "ارک قالاسی" ، "اورمو گؤلو" ، "آنا دیلی" و... گؤزلری گؤتورمه دن آرادان قالدیریرلار.
5
بو گونده پیچاغا بنزر ، الیمیزده ساپی بیر یانا تییه سی ده حتی اولمادان "تورک بؤلگه لری فراکسیاسی" قورولدو. هر بیر میللی فعال توپراغینین تاریخ - سیاسی طالعیندن درس آلیب و آییق اولاراق ایزین وئرمه مه لی دیر کی سونوجدا، آغلیمیزا گلمه ین باشیمزا گلن اوشاقلیق اوینوموزا بنزر چیمدیک له مک له قاتغیلی "جولو-جولویه نه قالدی" اوینو بارماقلارمیز اوستونده، یئنی یارانان فراکسیا الی ایله اوینانیلا.
آچیقلامالار:
{1} آتا- بابا سؤزلریندن دیر. اصلینده "جوره" دیر کی خالیق دئییمینده "جولو" دئییلیر.
{2} آتا- بابا سؤزلریندن دیر.
{3} قاراداغ دا بؤیوک آنایا " قاری ننه " دئییلیر. باشقا بؤلگه لرده یالنیز "ننه" ده دئییللر.
{4} قارداغ دا "قیتداماق" دئییلیر.
یازار : ابراهیم نوری ( ایتگین- قاراداغلی) 16/9/1395
