بو آراشتیرما، گونئی آزربایجان میللی حرکاتی‌نین ، ۲۱-جی یوزایلین تکنولوژیک یئنی‌لیک‌لری (سوسیال مئدیا، یاپای زکا، سایبر گووَنلیک آراچ‌لاری) قارشیسینداکی استراتژیک موقعیتینی تحلیل ائدیر. بو تکنولوژی لر حرکت اوچون ساده جه تاکتیکی آراچ‌لار دئییل، عئینی زاماندا موباریزه نین ماهیتینی دَییشدیرن بیر موباریزه مئیدانی دیر. یو یازی، تکنولوژی‌نین؛ تشکیلاتلانما یاپی‌سینی غئیری-مرکزلشدیرمه، رئژیمین روایت مونوپولیسینی قیرما و آلترناتیو سؤیله م اینشا ائتمه،"دئ-فاکتو" قورومساللیق (مثلاً، آنلاین دیل ائییتیمی) یاراتما و مسئله‌نی اولوسلارآراسیلاشدیرما قونولاریندا بؤیوک فرصت‌لر سوندوغونو گؤستریر. بونونلا بیرلیکده، رئژیم نظارتی ، دئزانفورماسییا کمپین‌لری و حرکت ایچی پارچالانما کیمی جیددی ریسک‌لری ده تحلیل ائدیر. سونوج اولاراق، حرکتین اوغورو، بو آراچ‌لاری داغینیق شکیلده قوللانماقدان چیخیب، تکنولوژی نی بوتؤو بیر استراتژیک پلانین پارچاسی حالینا گتیرمه سینه، و اؤز ایچینده "دیجیتال بیلیک" و "سایبر دایانیقلی‌لیق" ظرفیتینی آرتیرماسینا باغلیدیر.
گونوموز سیاسی موباریزه‌لری، بیلگی نین اوره‌تیمی، یاییلماسی و کونترولو اوزه‌رینده یوغونلاشیر. اوتوریتر رژیملر، کلاسیک باسقی مئتودلارینا (فیزیکی شیددت، حبس، سانسور) علاوه اولاراق، گلیشمیش تکنولوژیک نظارت و مانیپولیاسییا آراچ‌لارینی دا ائتکیلی بیر شکیلده قوللانماقدادیر. گونئی آزربایجان میللی حرکاتی کیمی، اساساً میللی-مدنی حاقلار، آنادیلی تحصیلی و کیملیک قورونماسی و ... اوزه‌رینده کؤک قوران، و محدود ایمکانلارا صاحیب اولان غئیری-دؤولت آکتورلاری اوچون بو یئنی دیجیتال دونیا، هم وارلیقسال بیر تهلوکه، هم ده تاریخی بیر فرصت تقدیم ائدیر.
کلاسیک موباریزه آنلاییشی، فیزیکی مئیدان‌لارا و هییرارشی تمللی تشکیلاتلارا باغلی ایدی. آنجاق اینترنت و سوسیال مئدیا، بو دینامیک‌لری کؤکوندن دَییشدیرمیشدیر. موباریزه، آرتیق جغرافی سرحدلرله محدود دئییل و شبکه لشمیش مقاومت فورماسینی آلمیشدیر. بو یازی، تکنولوژیک یئنی لیک لری اؤز سیاسی هدف‌لرینه چاتماق اوچون نئجه استراتژیک بیر گوج اولاراق دیرلندیرمه گرکدیگینی آراشدیرماقدادیر.
حرکات، تکنولوژینی ۴ اساس استراتژیک هدف اوچون بیر پیلله اولاراق قوللانمالی‌دیر:
۱.تشکیلاتلانما: هییرارشی‌دن "ریزوماتیک" یاپی یا
کلاسیک، مرکزیتچی و هیرارشی تمللی تشکیلات‌لار، دؤولتین نظارتی آلتیندا آسانیقلا هدفه آلینابیلیر (لیدئرلرین توتوقلانماسی، مرکزین داغیدیلماسی و...).
تئلگرام، سیگنال و ... کیمی پلتفورملار، حرکته "ریزوماتیک" یئرآلتی کؤک سیستمی کیمی یاییلان، چوخ مرکزلی، باشسیز بوجاقسیز بیر تشکیلاتلانما ایمکانی وئریر. بو یاپی‌دا، بیری ضربه آلسا بئله، شبکه‌نین دیگر بؤلوملری فعالیتینه داوام ائده‌بیلیر. بو حرکتین دایانیقلی‌لیغینی و باسقی‌لارا قارشی مقاومتینی کؤکلو شکیلده آرتیرار. بو، مرکزیتچی لیدئرلیگه دئییل، هماهنگ ائدیلمیش فعالیته اساسلانان بیر مودئل دیر.
۲. سؤیلم ساواشی
اوتوریتر دؤولت‌لرین ان بؤیوک گوجو، رسمی مئدیا و تحصیل سیستمی واسیطه سی ایله یاراتدیغی "رسمی روایت" دیر. بو روایتده، میللی حرکت‌لر "بؤلوجو"، "خاریجی گوجلرین اویونجاغی" و یا "امنیت تهدیدی" اولاراق آدلاندیریلیر. سوسیال مئدیا (ایکس، اینستاگرام، یوتیوب و...) و یاپای زکا (AI)، بو مونوپولینی قیرماق اوچون ان ائتکیلی سیلاح‌لاردیر.
حرکت، اؤز روایتینی ("میللی-مدنی حاقلار"، "چئوره عدالتسیزلیگی - اورمو گؤلو"، "آنادیلی تحصیلی"، "دئموکراسی"و...) یوکسک کئیفیتلی، گؤرسه ل و ائتکیلی محتوالارلا (قیسا فیلم، اینفوگرافیک، پودکست) دوغرودان کوتله‌لره و دونیایا چاتدیرابیلیر.
یاپای زکا، محدود اینسان قایناغی ایله بئله، چوخ دیللی (تورکجه، اینگیلیزجه، فارسجا،عربجه و...) محتوالارین سورعتله اوره‌تیلمه‌سینه، مقاله‌لرین گلیشتیرمه سینه و ویدئولارین ترجومه ائدیلمه‌سینه ایمکان تانییاراق، حرکتین سسینی دونیا گئنلینده دویورور.
۳. "دئفاکتو" قورومساللیق
سیاسی موباریزه ده اوغور، چوخ زامان رئژیمین وئرمه‌دیگی حاقلاری "دئفاکتو" قازانماقدادیر. میللی حرکاتیمیزین ان اؤنملی ایسته ک لرینده بیری "آنادیلینده تحصیل"دیر و رئژیم بونا رسمی اولاراق ایجازه وئرمیر.
تکنولوژی، رئژیمین ایجازه‌سینه محتاج اولمادان بو هدفه چاتماغا ایمکان وئریر. آنلاین تحصیل پلتفورملاری ، یوتیوب درسلری، موبایل اویقولامالاری و یاپای زکا تمللی دیل اؤیره تیم آراچ‌لاری واسیطه‌سی ایله بیر "دیجیتال آنادیلی آکادئمیسی" قورولابیلیر (نئجه کی بونا اؤرنه ک وئرمه ک گره کیرسه دئمه لیییک کی سون بیر نئچه ایلده آزربایجان جمهوریتی طرفینده اینترنت ساحه سینده آنا دیلی درسلری آدیندا درسلر هر کس و هر یاش اوچون فعالیته باشلاییب). بو، سیاسی اولاراق، رئژیمین فارس دیلینده تحصیل اوزه‌رینده‌کی انحصار طلب لیغینی عملده قیریر و حرکتین قوروم یاراتما ظرفیتینی گؤستریر. عئینی شکیلده، دیجیتال کیتابخانالار و آرشیولر، کولتورل میراثی قورویاراق گله‌جک نسیللره آختاریر.
۴. دیجیتال دیپلوماسی و اولوسلارآراسیلاشدیرما
بیر حرکتین ایچه‌ریده‌کی باسقی‌لاری آزالتماسی، چوخ زامان خاریجی دیپلوماتیک باسقی‌لارا باغلیدیر.
سوسیال مئدیا، آرتیق ساده‌جه بیر خبرلشمه آراجی دئییل، بیر "دیجیتال دیپلوماسی" مئیدانی‌دیر.
میللی حرکاتیمیز، AI ترجومه آراچ‌لارینی قوللاناراق، اولوسلارآراسی اینسان حاقلاری قورولوش‌لارینی، بیرلشمیش میللت لر راپورتؤرلرینی، خاریجی مئدیا اورقانلارینی و دیگر دؤولت‌لرین قرار آلیجی‌لارینی دوغرودان هدف آلان، دقیق، سندلی و پروفئسیونال بیلگی آخیشی ساغلایابیلیر.
هشتگ کمپین‌لری ، ساده‌جه بیر شعار آتماق اوچون دئییل، گلوبال گونده می قیسا سوره‌لی ده اولسا تعیین ائتمک و اولوسلارآراسی مئدیانین دیققتینی بیر نقطه یه چکمه ک اوچون استراتژیک بیر عملیات دیر.
تکنولوژی، میللی حرکاتین قوللاندیغی قدر، رئژیمین ده قوللاندیغی و حتی داها گلیشمیش ایمکانلارا صاحیب اولدوغو بیر ساحه‌دیر.
رژیم، گلیشمیش سایبر ایزله‌مه، دئیتا توپلاما و آنالیز تئکنیک لری ایله میللی فعال‌لارین ارتباطلارینی ایزله ییر، کیملیک‌لرینی تثبیت ائدیر و شبکه‌لره سیزیر. هر دیجیتال فعالیت (لایک، پایلاشیم، مئساژ) بیر "آیاق ایزی" بوراخیر.
بوتون میللی فعال‌لارا VPN، شیفره لنمیش ایله تیشیم، ایکی آشامالی دوغرولاما و گووَنلی تاراما آراجلاری حاقیندا مجبور ائییتیم وئریلمه‌لی‌دیر.
تشکیلات ایچی ارتباطلاردا "هئچ کیمسه تام گووه نیلیر دئییل" پرینسیپی ایله حرکت ائدیلمه‌لی، بیلگی پایلاشیمی "بیلگی‌لنمه‌سی گرکن قدر" اساسیندا محدودلاشدیریلمالی‌دیر.
دؤولت تمللی سایبر اوردولار (ترول‌لار)، حرکتین اعتیبارینی سارسماق، فعال‌لار آراسینا نیفاق سالماق و کوتله‌نین اعتیمادینی سارسماق اوچون سیستماتیک دئزانفورماسییا، یالان خبر و قارا پروپاقاندا یاییر. یاپای زکا ایله اوره‌تیلن "Deepfake" ویدئولار بو تهدیدی داها دا جیددیلشدیریر.
حرکات، گووه نیلیر قایناق‌لاردان اولوشان، یاییلان خبرلری سورعتله یوخلاییب دوغرولایان و یا یالانلایان بیر ایچ مئکانیزما قورمالی‌دیر.
کوتله‌نین ایناندیغی بللی باشلی حساب‌لار و کانال‌لار، بیلگی‌نین دوغرولانمیش قایناغی اولاراق گوجلندیریلمه‌لی‌دیر.
سوسیال مئدیا الگوریتم‌لری، اینسانلاری ساده‌جه اؤز فیکیرلرینه یاخین محتوالارلا قارشیلاشدیریر. بو دوروم، میللی حرکت ایچینده‌کی فرقلی فیکیرلی قروپ‌لارین بیربیریندن تامامن اوزاقلاشماسینا، ایدئولوژیک قوطبلاشمانین آرتماسینا و اورتاق استراتژیده آنلاشما ایمکانی‌نین آزالماسینا سبب اولور.
میللی حرکات، فرقلی گؤروشلری بیر آرایا گتیرن، ساغلیقلی موباحثه‌نی تشویق ائدن گووه نلی آنلاین پلتفورملار (مثلاً، خصوصی فوروم‌لار، کلاب‌هاوس اوتاق‌لاری) یاراتمالی و بو دیالوقو آکتیو شکیلده یؤنتمه‌لی‌دیر.
تکنولوژی، گونئی آزربایجان میللی حرکاتی اوچون بیر آماچ دئییل، او آماجا چاتماق اوچون موباریزه‌نین آپاریلدیغی یئنی و حیاتی بیر مئیدان دیر. بو ساحه‌ده اوغور قازانماق، ساده‌جه تکنولوژیک آراچ‌لاری قوللانماقلا دئییل، استراتژیک بیر ذهنیت دئیشیکلیگی ایله مومکوندور.
داغینیق و رئاکتیو سوسیال مئدیا فعالیت‌لری یئرینه، اوزون مدتلی هدف‌لری اولان، اؤلچوله‌بیلن و بوتؤو بیر دیجیتال استراتژی تعیین ائدیلمه‌لی‌دیر.
میللی حرکاتیمیز، اؤز ایچیندن سایبر گووَنلیک اوزمان‌لاری، وئری تحلیلچی‌لری، یاپای زکا مهندیس‌لری و پروفئسیونال دیجیتال محتوا اوره‌تیجی‌لری یئتیشدیرمه‌لی‌دیر.
تشکیلاتلانمادا گووه نلیک و دایانیقلی‌لیق، سورعت و گؤرونورلوکدن داها اؤنجه‌لیکلی اولمالی‌دیر.
سونوچدا دیجیتال چاغ، اؤز سسیمیزی دونیایا دویورماق، رئژیمین باسقی مئکانیزم لرینی ائتکیسیزلشدیرمک و حتی دئفاکتو قازانجلار الده ائتمک اوچون بؤیوک ایمکان‌لار سونور. آنجاق بو ایمکان‌لار، بو ساحه‌نین ریسک‌لرینی یاخشی آنلایان و بونلارا قارشی آغیللی قارشی استراتژی لر گلیشدیرن بیر یاناشما ایله گرچکلشه بیلر.
