آذر آیینین 26 سی، زنگان بیلیم یوردونون کولتورل توپلومسال اشراق اوجاغی، ملی شاعریمیز هوشنگ جعفری جناب‌لارینین حضوری ایله تانیتیم تؤره‌نیسینی قوردو.
تؤرن بئش بؤلوم‌دن عبارت ایدی:
بیرینجی بؤلوم‌ده اوجاغین سایین دبیری میلاد صیادی جناب‌لاری، اوجاغین آماجی و آپاردیغی برنامه‌لر باره‌سینده اؤیرنجی‌لره معلومات وئردی و اوجاغین ایندیکی و کئچمیش برنامه‌لری ایسه بیر کلیپ قالبینده تانیتیلدی. اوجاغین ایندیکی برنامه‌لریندن، دیل کلاس‌لاری(آذربایجان تورکجه‌سی، تورکیه تورکجه‌سی) ، 10 ایل دایانمادان هفته‌لیک قورولان شعر اوتوروم‌لاری، تئاتر ایش قوروپو، موسیقی ایش قوروپو، قادین‌لار ایش قوروپو، درگی ایش قوروپ‌لاری و باشقا برنامه‌لری سایماق اولار.
ایکینجی بؤلوم، موسیقی‌یه عایید ایدی. روحو اوخشایان، اوجاغیمیزین گنج موسیقیچی‌لرینین اجرالاری ایفا اولوندو. مهدی فاطمی، ناصر مصطفایی و مهدی آقاکریمی جناب‌لاری دیلبریم جان، هر شئییم‌سن، وفاسیز عشقیم و بو قالا داشلی قالا عنوانلی آذربایجان پاپ ژانریندا یئر آلان قطعه‌لرینی اجرا ائتدیلر.
اوچونحو بؤلوم‌ده، شاعرلریمیز شعر ایفاسی اوچون چاغیریلدیلار. ایلک اؤنجه اوجاغیمیزین گنج شاعری پرویز بی علیزاده تریبون آرخاسیندا شعرلرینی ایفا ائتدیلر(آرتیرمالییام علیزاده جناب‌لارینین «سوسوز» آدلی شعر توپلوسو نئچه آی اؤنجه یایینلاندی.) سونرا ملی شاعرمیز هوشنگ جعفری جناب‌لاری اؤیرنجی‌لرینین آلقیش‌لاری ایله سئن اوستونه چیخدیلار. آغ آتیم و ساوالان شعرلرینی اؤیرنجی‌لره سوندولار.
کئچن ایل‌لردن فرقله‌نه‌رک، بو ایل تانیتیم تؤره‌نینده یئنی بیر بؤلوم آرتیلمیشدی. دؤردونجو بؤلوم‌ده تورکجه استندآپ کمدی اجرا اولوندو. بو بؤلوم‌ده گنج هنرمندیمیز مهدی بی سرافراز ین گولونج ایفالاری، اؤیرنجی‌لرین دوداق‌لارینا گولوش باغیشلادی.
سون بؤلوم‌ده ایسه اوجاغین کئچن دؤوره‌لرینین چالیشقان اویه‌لریندن تقدیر عمله گلدی.
آذوح
