"...دوغراسالار دیلیم دیلیم،
منیم دیلیم،
اولن دئییل..."
بیر میللتین وارلیغی توپراق، تاریخ و... و هر بیر وارلیقدان اونجه، اونون دیلی حئساب اولونور و اونون اوچون ده استعمارچی دولت، بیر میللتی اوز مستعمره سینه چئویرمک اوچون ایلک اونون دیلینی الیندن آلماقا چالیشیر.
بیر حالدا کی 1999 ایل‌دن اعتیبارا بيرلشميش میللتلر تشكيلاتی‌نین آلدیغی قرار اوزره 21 فئورال دونیا آنادیلی گونو آدلانمیش و بوتون اؤلکه‌لرده بایرام کیمی قئید اولونور، نه یازیق کی آذربایجان تورک میللتی هله ده دیل حاقلارینا مالیک اولمامیش، هله ده تاپداقلار آلتیندا ازیلمکده‌دیر.
ایران آنایاساسی‌نین 15 مادده‌سی فارس اولمایان میللت‌لرین اؤز آنادیلینده اوخوماقی اؤن گؤرسه ده هئچ بیر زامان او مادده عملی اولماییب‌دیر و نه تک دؤولت اورقانلاری بونون دوغرولتوسوندا هئچ بیر آتتیم آتمیر، حتی میللی درنکلر و شخصلرین کؤنوللو چابالارینا بئله انگل اولورلار. بئله‌لیکه، دؤلت اورقانلاري بیلرکدن، آذربایجان تورکلرینی سس‌سیزجه اریدیب، ایتیرمگه چالیشیر.
شرفلی آذربایجان تورک میللتی!
آذربایجان میللی حرکتی ان حساس گون‌لرینی یاشاماقدا‌دیر. بؤلگه‌دکی دئییشیک‌لیک‌لر البته کی بیزیم حرکتی ده اؤز تأثیری آلتینا آلا‌جاق‌دیر. اؤز وارلیقلاریمیزا صاحیب چیخا‌راق تورک دیلینده مدرسه، آنا دیلینده مدرسه، اولما‌لی‌دیر هر کسه شعاری ایله اؤلکه‌ده دیل قاداغاسی علئیهینه اعتیراض سسیمیزی اوجالتمالیییق.
ایران اسلام رئژیمی نین اؤلکه ده فارس اولمایان میللت لرین دیللرینه قویدوغو قانونسوز قاداغانی محکوم ائدیب، بو سیاستی غئیری اینسانی اولدوغوندان قیناییب، ایراندا تورک نوفوسونون سایی سینا اساسلاناراق آذربایجان تورکجه سینین رسمی دوولت دیلی اولماسینی ایسته ییریک.
یاشاسین آذربایجان،
یاشاسین تورک میللتی،
گوج، بیرلیکده دیر...
آذربایجان اویرنجی حرکاتی- آذوح
