عزیز آزربایجان تورک میلتی؛
۱۴ایل بوندان اؤنجه ۱۳۸۵ گونش ایلی نین خرداد آییندا گونئی آزربایجاندا تاریخی حادثه لر یاشاندی و بو گونلر میلتیمیزین شانلی تاریخینه قیزیل صحیفه لر کیمی یازیلدی. یوز ایلدن بری اؤلکه یه حاکیم اولان و وطنیمیزی سؤمورگه یه چئویرن عیرقچی و فاشیست استعمارچی سیستیمین سایه سینده اورتایا چیخان لمپن ایرانچی ذهنیت بئله بیلیردی کی ایسته دیگی زامان ایسته دیگی کیمی تورک میلتینه حقارت ائده بیلر و بونون هئچ بیر قارشیلیغی اولمایاجاقدیر.
۱۳۸۵ اردیبهشت آییندا ایران قزئته سینده چکیلن چیرکین کاریکاتور و داها چیرکین آچیقلامالاری ایسه تام اولاراق بو ذهنیتین بیر سونوجو ایدی. طبیعی کی سوروملولاری نین بو ایدعاسی کی بو یازیدا عمد یوخ ایدی تماماً یالان ایدی، چونکو یازی اصلینده تمامی ایله دوشونولموش بیر سیاسی بیاناتدان عیبارت ایدی و بئله بیر سیاسی بیاناتین سهواً یازیلماسی هئچ بیر منطیقه اویغون دئییل.
بیلیم یوردلاریندان باشلایان اعتراضلار خرداد آی نین بیری اعتباری ایله عومومیلشدی و بوتون گونئی آزربایجانا یاییلان اعتراض دالغاسیندا اونلارجا تورک شهرینده ائله معظم صحنه لر اورتایا چیخدی و ائله بیر تاریخ یازیلدی کی استعمارچی فاشیستلر سانکی اوزلرینه سیلله یئمیش کیمی بیر آندا یوخودان اویاندیلار. طبیعی کی ایران دؤولتی نین یالاندان و گؤسترمه لیک شکیلده وئردیگی جزالار هئچ بیر آنلام ایفاده ائتمیردی، چونکو یوز ایللیک بیر یوخو پوزولموشدو و تاریخده یئنی بیر صحیفه آچیلمیشدیر.
۱۳۸۵ خردادی نین آنتی فاشیسم و آنتی آپارتاید قیامی، بیر کاریکاتورا گؤستریلن آنلیق بیر تپکی دئییلدی. هئچ بیر ملت اون گون ایچینده آیاغا قالخماغا قرار وئرمز. بیر میلی قیامین زمینه سی نین اولوشماسی اوچون اوزون ایللر و چوخلو شرطلر لازیمدیر. ایران دؤولتینه حاکیم اولان فارسچی فاشیزمین یوز ایله یاخین مودتده تورک میلتینه تحمیل ائله دیگی مدنی، اقتصادی، سیاسی و توپلومسال، جغرافیایی سؤمورگه چیلیک (استعمار) بو قیامین اساس سببی ایدی؛ او کاریکاتور و یازی سادجه بارداغی داشیران سون داملا ایدی. اما نه یازیق کی او قیامدا دا ایران دؤولتی بیر داها اؤز قدار و چیرکین اوزونو گؤستردی و کئچمیشده اولدوغو کیمی بیر داها میلتیمیزی اؤز قانیندا بوغدو.
بیز، «آزربایجان سیاسی قورولوشلاری نین امکداشلیق پلاتفورمو» اولاراق او میلی قیامدا شهید دوشن وطنداشلاریمیزی سایغی ایله آنیریق و اینانیریق کی اونلار تاریخیمیزده اؤلومسوزلوگه قوووشوبلار و سونسوزا دک میلتیمیزین کؤنلونده عزتله یاشایاجاقلار.
آیریجا بیر داها بیلدیریریک کی، ۱۳۸۵خرداد قیامی نین آچدیغی جیغیر آرتیق میلیونلارلا یولجوسو اولان بؤیوک بیر یول حالینا گلیبدیر و او یول وطنیمیزین و میلتیمیزین اؤز طالعینه و موقدراتینا شرفلیجه حاکیم اولماسی یولودور. بو یول آرتیق گئری دؤنوشو اولمایان شرفلی بیر یولدور. بیز ده بو یولدا سونونا قدر یورویه جگیمیزه بو وسیله ایله بیر داها آندیمیزی یئنیله ییریک. شوبهه سیز میلی موجادیله میز وطنیمیز و میلتیمیزین نهایی قورتولوشو و آزادلیغینا قدر دوام ائده جکدیر.
یاشاسین آزربایجان تورک میلتی؛ یاشاسین قورتولوش و اؤزگورلوک
«آزربایجان سیاسی قورولوشلاری نین امکداشلیق پلاتفورمو»
(آذوح – دیرنیش – گادپ)
1 خرداد 1399
