بیرینجی پرده
(بیری سی یوخودا سایاقلایارکن یانینداکی لار تخت دن ائنیب باشینین اوستونه ییغیلاراق دانیشیق لارینا قولاق وئریرلر.)
سایاقلایان: گلین جاماهات هئی گلین ، دلی اولورام
بیرینجی آدام: گؤره سن بو کیشی یه نه اولوب؟ اولمایا دوغرودان دلی اولوب.
ایکینجی آدام: آغزیندا یوخولو دئییرسن. نه دلی سی؟!
سایاقلایان: ایلاهی ؛ گؤردوکلریمنن، دوشوندوکلریم ایله ائشیتدیکلریم بیر-بیرینه اوخشامیر. آخی اولا بیلر گؤزده بو قدر یالانچی اولا!!
(های – کوی جاماهاتین پیچیلدامالاری ایله اوجالیر. بیردن بیر بوغلونون سؤزو، سسلری یاتیردیر)
بوغلو آدام: دینمه یین گؤرک. بو کیشی بیزی چاتلا باغیر ائله دی.
سایاقلایان: کئچه ن هفته "ششگیلان"-ا گئتمیشدیم. عزیز خان ین جانلا-باشلا چپرچکدیگی یئره. ثقه الاسلام ین قبرینی هانکی توفاغی داغیلمیش سؤکوب ، یئردن اوجادا اوجورسونا قویوب قاچیب دیر
دؤردونجو آدام:(گولومسه یرک) بیزده دئییریک بس ایندی نه دییه جک.
سایاقلایان: هله بیر یاندان دا توزاناقلی شهرین دولان با دولان کوچه لرین "قارا گیله" م له آدیق لایاراق، بیردن ارک قاباغینا یئتیشدیک. اوره گیم توتولدوغو اوچون ایسته دیم قاراداغلی "آشیق حسین جاوان"ین ساز چالماغینی دینله یم. آمما بیلمیرم نییه ساغا-سولا باخاراق بینانی تاپا بیلمه دیم. سو اولوب کئچمیشدی یئره.
بئشینجی آدام: الله اکبر؛ اولمایا بو کیشی شهری ده شیک توتوب. چال-چاغیر تبریزده؟ اولمایا الان باکی دا دولانیر؟آخی بیزده بوردا یاشاییریق ، بو دیین لری نییه گؤرمه می شیک.
(آدیم لایا – آدیم لایا "گولوستان باغی" نین اؤنونده دؤولت میتینگینه ساری گئدیر.هئیکه لی گؤرمه یه رک سورغو بئینینده دولانیر.)
سایاقلایان: هئیهات ، گونون-گون اورتا چاغی گؤره سن او آتش اوره کلی میللی سردارین هئیکلین کیم اوغورلاییب؟
(میتینگ اورتاسیندان دا آرابالار گل –گئتده دیر. اوزون آرابالارین ایچی هئی دول-بوش اولاراق اوزونلوغونو ایندی یه دک گؤرمه مه یی اوچون چاشیر. یاخینلاشیب اوستونده کی یازی لاری اوخویور. تبریز 2018 ..... اوزون ماشین لارین دورودوغو یئره گؤز قویوب اوردا دایانانین بیری سینه یاخینلاشیر)
سایاقلایان: سلام، بو ماشینین آدی نه ؟
دورلاق داکی آدام: علیکم الاسلام؛ بورالی دئییلسن؟ BRT-دی دا. تبریزین او باشیندان بو باشینا گلیر و قاییدیر.
سایاقلایان: چوخ گؤزه ل. یانی بوننان تبریزه او باش بو باش ائتمک اولار. آمما منه ائله گلیر تبریز چوخ تیکینتی له نیب . نقشه اولسایدی یاخجی اولاردی.
دورلاق داکی آدام: ائله بو ایستگاه لاردا(دورلاق) نقشه وار. (الی ایله گؤرسه ده رک) بوتوخانا ، باخا بیلرسن.
(سایاقلایان باشی ایله سؤزونو تایید ائده رکن نقشه یه گؤز تیکیر. باخدیقجا گیجه لیب آز قالیر گؤزو قارالا. دورلاق داکی آدامی داها دانیشدیریر)
سایاقلایان: باغیشلایین بو نقشه ده یئرلر تانیش دیر آنجاق آدلاری بیر آزجا تانیش گلیر . لوطفا منه آچیخلایین
دورلاق داکی آدام: دئگینن گؤروم
(سایاقلایان یالنیز بارماغی ایله هؤججوله یه نمه مه گی اوچون یاخینلاشدیراراق گؤستریر. ایلک بارماغین قویور"کوی دمشیقیه" اوستونه سونرا باخیر دورلاق داکی آدام ین اوزونه)
سایاقلایان: بورا؟
دورلاق داکی آدام:(گولومسه یه رک) بابا ، هامان "گوموش قیه" دی دا.
(ایکینجی دؤنه بارماغین"شاد باب مشایخ" اوستونه قویوب)
سایاقلایان: دئگینن بورا هارادیر؟
دورلاقداکی آدام: "پینه شالوار".
(داها بارماغین "احمقیه" اوستونه قویاراق دورلاق داکی آدامین گؤزلرینه دالیر و ائشیدیر)
دورلاق داکی آدام: "آخما قیه"
(سایاقلایان سس سیزله یه رک بیردن قیشقیریر)
سایاقلایان: تاپدیم – تاپدیم
آلتینجی آدام: دییه سن دای یاواش – یاواش آغلا- باشا گلیر.
سایاقلایان: گلدیگیم یولو عمارته ساری قاییدیب ، اوردان یانیت آلا بیلرم.
ایکینجی پرده
(یولا چیخدیغین دا توکانلارین شوشه سینده ایله تابلولاریندا اؤزگه دیلده یاپیشدیریلماسین گؤرور.)
سایاقلایان: تورکجه یازی لاری کیم دام – دوواردان سویوب. آی آللاه
(سایاقلایان نئچه توکانا گیریب اونلاری دانیشدیریر. گؤرور تورکجه دانیشیرلار.)
سایاقلایان: آللاها مین شوکور، تورکو دانیشیرلار. آمما آخی بس نییه یازی لار تورکجه دئییل؟ مگر رسمی دیل تورکجه دئییل دی می؟
(توکانلاردا ائشیگه چیخاندا نئچه دیقه دن سونرا عمارت قاباغینا یئتیشیر)
سایاقلایان: عمارت ین باشینداکی قیرمیزی قانلی بایراق نئجه اولوب؟ مئیدانداکی میللی سردارین هئیکلی هانی؟
(بیرینی تانی مادان قاباغین آلیب سورغولانیر)
سایاقلایان: باغیشلا همشهری ، بیر زاد سوروشوم
یولدان کئچه ن: بویور
سایاقلایان: "پیشه وری" هاردادیر؟
یولدان کئچه ن: او کیم دیر.
(سایاقلایان کیشی یولدان کئچه نین یانیتلاریندان اوزولوب، باشینی آشاغی توتاراق بیلمه دن گئدیر. بیردن ساغا باخیب سئوینجیدن قوروموش دوداقلاری گولومسه نیر. یالنیزجا آراییر. بیردن بیره یئنه ده آلت-اوست دوداقلاری ترپه نیر.)
سایاقلایان: بس هانی فریدون ابراهیمی نین ، بی ریانین دفترلری؟ مگر بورا تربیت دئییل؟
یئددینجی آدام: گؤره سن اونلار کیمدی؟
اوچونجو پرده
(قارا گیله ایله بیرلیکده پخله یئمک بئیین لرینه ووراراق اؤنوندن میللی اوردونون رژه گئتمه یینده تاماشا ائتمه گی اوچون توکانا گیریرلر.)
سایاقلایان: سالام قارداش، بیزه ایکی دنه پخله وئر.
پخله چی: باش اوسته.
سایاقلایان: ایندی اخبار واختیدی. او رادیونودا آچسان یاخجی اولار. فیرقه دؤولت ینین سون سؤزلرین ائشیده ک. دینه لیک ظفر مارشی سین.
پخله چی: اوسسون آچیم. آمما هانسی فیرقه دؤولتی؟
سایاقلایان: یانی نه؟! فیرقه بیردنه دی دا
پخله چی: آغلین باشین دادیر؟ آی خانیم بو کیشی نه دئییر؟ سن بیر سؤز دئگینن.
قارا گیله: بوش وئر. آچ قولاق آساق.
رادیو: بعلت عدم بارش سالانه ، دریاچه اورمیه در حال خشکیدن است. طبق نظر کارشناسان.....
سایاقلایان: اورمو گؤلونه نه اولوب؟
پخله چی: بیلمیرسن؟ قورویور دا
سایاقلایان: یانی اورمو گؤلو ، اورمو چؤلو اولور؟
پخله چی:یوخ ائله گؤل آدی اوستونده دیر.
سایاقلایان: آخی تک آدنان اولماز کی ، گرک اعتراض اولونا.
پخله چی: آ کیشی اعتراض ائدن لری توتوب داما باسیرلار.
سایاقلایان: فیرقه ده دییه سن چاش-باش ویریر ها!!! دئگینن گؤروم کیم لری توتوب لار؟
پخله چی: چوخلارین، حدسیز-حئسابسیز. ائوده اوغلوم وار "گوناز"-ا باخار. اوردان ائشیددیم "بهنام شیخی" آدیندا بیری سینی اعتراض چی اولدوغو اوچون تبریزین زیندانینا وئریب لر.
سایاقلایان: نه دئییم. من کی بو ایشلره قالمیشام. هله رادیون نییه فارسی سسی چیخیر؟
پخله چی: هر یئر فارسی اولوب دا. رادیو ، تلویزیون و توت گئتسین.
دؤردونجو پرده
بیرینجی آدام: دای گؤرر . سیز آللاه بو کیشی نی بئله باشینا بوشلاسان ، سایاقلایاجاق. آخیردادا قورخورام بیزی ده دلی ائده.
ایکینجی آدام: دوز دئییرسن. بس نئیله یک؟
بیرینجی آدام: یاواشجا اویاداق دا.
اوچونجو آدام: قوی من اویادیم.
بئشینجی پرده
اوچونجو آدام: رسول-رسول دوگونان. یوخو گؤرورسن
(رسول یاواشجا گؤزلرین آچیر)
رسول: نه اولوب مگر؟ باشیما نییه ییغیلیب سینیز؟
دؤردونجو آدام: کیشی گئجه دن ایندی یه کیمی هزیان دئییرسن. سحر یئمه گی گلیب. گئجه ده شام سیز یاتدین. بلکه سایاقلاماقلارین شام سیزلیغیندان اولا!! دور چؤره گو یئگینن.
(ساکیت جه باشینا ییغیلانلاری سئیر ائده رک دئییر.)
رسول: یوروش هانی؟ حسین هاردا؟ لطیف دن نه خبر؟ سیامک-ه نه اولدو؟
دؤردونجو آدام: رسول قارداش بیز اونلاری گؤرمه می شیک. بیرینه سؤزون وارسا تئلفون نومره سین دئگینن ، زنگ ووروب یئتیره ک.
رسول: یاخجی ، یازگینان 1324......
دؤردونجو آدام: آدی نه؟ نه دئییم؟
رسول: آدی چنلی بئل. دئگینن رسول صبحانه ده یئمه دی.
آلتینجی پرده
(دؤردونجو آدام پوتغایا ساری گئدیب نومره نی توتور)
دؤردونجو آدام: الو، الو
ائشیکده کی آدام: بلی ، بویورون.
دؤردونجو آدام: من تبریز زیندانین دان زنگ وورورام. رسول رضوی نین هم خرجی یم. دئدی کی سیزه یئتیره م صبحانه ده یئمه دی.
ائشیکده کی آدام: باشا دوشدوم. هامی میزین دیلی جن دییرسن داریخما قارداش. قارا گونون عؤمرو آز اولار.
دؤردونجو آدام: منیم تئلفون واختیم قورتاریر. خداحافظ.
ائشیکده کی آدام: هله لیک.
یازار: ابراهیم نوری(ایتگین-قاراداغلی)
