آذربایجان جمهوریییتی ایله ارمنیستان آراسیندا باش وئرن حربی چاتیشمادان سونرا و ۱۰ مهر ۱۳۹۹-جی ایل تاریخینده آذربایجان جمهوریییتینه دستک چاغیریشی و “ایسلام جمهورییتینین و روسیانین ارمنیستانا دسته‌یینه” اعتراض اولاراق سوسیال مئدیادا بیر چاغیریشین یاییملانماسیندان سونرا موختلیف شهرلرده اعتراض میتینقلری کئچیریلدی.
تهران، تبریز، اورمیه، اردبیل، زنجان، مشکین‌شهر، ماراغا، مرند، سولدوز و پارساباد دا داخیل اولماقلا موختلیف شهرلرده کئچیریلن بعضی میتینقلر تهلوکه‌‌‌سیزلیک قوه‌لری‌نین موداخیله‌سی ایله شدته چئوریلدی و ۱۰۰ نفردن چوخ وطنداش تهلوکه‌‌‌سیزلیک قوه‌لری طرفیندن توتوقلاندی.
سون گونلرده اونلارلا آذربایجانلی سیاسی، مدنی و اؤیرنجی فعال موختلیف شهرلرین اطلاعات ایداره‌لرینه و گوونلیک پولیسینه چاغیریلدی و یا تهلوکه‌‌‌سیزلیک قوه‌لری طرفیندن ائولرینده باسقین ائدیلدی.
معلوماتلارا گؤره، ایرانین موختلیف شهرلرینده ایسلام جمهوریییتی‌نین ارمنیستانا دستک وئرمه‌سینه اعتراض ائدنلردن ۱۰۰ نفردن چوخو توتوقلانیب. ارمنیستانلا آذربایجان آراسینداکی حربی قارشیدورما و ایسلام جمهوریییتی‌نین ارمنیستان دسته‌یینه اعتراض چاغیریشی‌نین یاییملانماسیندان سونرا ۱۰ مهرده ایرانین موختلیف شهرلرینده میتینقلر کئچیریلدی. اعتراضچیلارین توتوقلانماسینا سبب اولان میتینقلر.
ایران‌وایرین تهرانداکی وطنداش ژورنالیستی‌نین وئردیگی بیلگیلره گؤره، “تهلوکه‌‌‌سیزلیک قوه‌لری میتینقلر باشلامازدان اؤنجه وطنداشلاری توتوقلامایا باشلادیلار و چوخ سایدا قادینین دا ایشتیراک ائتدیگی میتینقلر باشلایارکن، اعتراضچیلار پولیس و شخصی گئییملی مامورلار طرفیندن دؤیوله‌رک توتوقلاندیلار و ایمام حسین مئیدانیندا اولان «عترت کولتور مرکزینه» کؤچورولدولر. تهلوکه‌‌‌سیزلیک قوه‌لری توتولانلاری آپارماق اوچون دؤرددن چوخ ون اتوموبیلدن ایستیفاده ائتدیلر”.
تبریزده‌ده، تهرانلا عینی واختدا، بو شهرین راستا کوچه خیابانیندا بیر اعتراض میتینقی باشلادی. وطنداش ژورنالیستلرین ایران‌وایره گؤندردیکلری ویدئولارا گؤره، تهلوکه‌‌‌سیزلیک قوه‌لری‌نین موداخیله‌سی ایله تبریزلی وطنداشلارین باریشجیل بیر شکیلده توپلانماسی شدته چئوریلدی. پولیس و شخصی گئییملی مامورلار اعتراضچیلاری داغیتماق اوچون گؤزیاشاردیجی قاز، رئزین گولـله‌لر و دیَه‌نکلر ایله سالدیردیلار. شاهیدلرین سؤزلرینه گؤره، قارشیدورما زامانی چوخ سایدا اینسان دؤیولدو و تخمیناً ۴۰ نفر تهلوکه‌‌‌سیزلیک قوه‌لری طرفیندن توتوقلاندی.
ایران‌وایرین معلوماتلی منبع‌لریندن آلینان بیلگیلره گؤره، «مرتضی نقی‌زاده»، «مجتبی نقی‌زاده»، «محمد نقی‌زاده»، «سعدالله ساسانی» و «میلاد اکبری» اطلاعات مامورلاری طرفیندن دؤیوله‌رک توتوقلانیب و بلیرسیز بیر یئره کؤچورولدو.
اورمیه‌ده عینی زاماندا بیر اعتراض میتینقی کئچیریلدی، ایران‌وایرین معلوماتلی منبع‌سینه گؤره، ایمام و عطایی خیابانلارینداکی اعتراضچیلار پولیس و اطلاعات قوه‌لری طرفیندن دؤیوله‌رک توتولدو. بو منبع‌یه گؤره اورمیه میتینقلرینده‌کی قادینلار بو اعتراضلاری باشلادان اولدولار.
ایران‌وایرین آلدیغی معلوماتا گؤره، بو ایل ۱۰ مهر تاریخینده اورمیه‌ده توتولان اعتراضچیلارین «جواد رضایی»، «یونس شیرزاد»، «سهند بهنمون»، «سالار طاهر افشار»، «فرهاد محمدی» و «خانم انتخابی»نین کیملیگی معین ائدیلدی و اونلار وثیقه قویدوقدان سونرا ۱۱ مهر محکمه مرحله‌‌‌سی‌نین تاماملانماسی‌نین سونونا قدر مووقتی اولاراق سربست بوراخیلدیلار. «هوشنگ نقی‌زاده»، «امیر گوهری»، «اشکان سعادت‌مهر» و «رضا خلیلی»ده، ۱۰ مهر تاریخینده اورمیه تهلوکه‌‌‌سیزلیک پولیسینه چاغریلدی و همین گون ساعت ۲۰-ده سورغویا چکیلدیکدن سونرا سربست بوراخیلدیلار.
ایران‌وایرین آلدیغی خبره گؤره، ۱۰ مهر سحردن بری اورمیه اطلاعات و گوونلیک پولیسی تلفونلا بو شهرین یوزدن چوخ فعالینی آرایاراق حبس ائتمکله تهدید ائدیب. البتده کی، اکثر فعاللار هر هانسی بیر تلفون چاغیریشی‌نین حوقوقی اعتبارسیزلیغینی وورغولایاراق گئتمکدن ایمتینا ائدیبلر.
زنجان اعتراض میتینقلری‌نین شدته چئوریلدیگی و بیر نئچه اعتراضچی‌نین حبس اولوندوغو باشقا بیر شهر ایدی. زنجاندا، ایران‌وایرین منبع‌لری طرفیندن یئددی نفرین اطلاعات و پولیس مامورلاری طرفیندن توتوقلاندیغی آنجاق «سلطانی»، «مجید کریمی» و«اکبر قره‌باغی» آدلی توتوقلانانلاری‌نین آدلاری‌نین بللی اولوندوغو بیلدیریلدی. ۱۰ مهرده اکبر قاراباغی‌نین باجیسی سوسیال شبکده قارداشی‌نین دؤیولدویونو و کیملیکلری بللی اولان هر اوچ شخصین سربست بوراخیلدیغینی بیلدیردی.
اردبیلده‌کی معلوماتلی منبع‌لرین وئردیگی بیلگیلره گؤره، ۱۱ مهر حاکم نونهالین صدرلیگی ایله اردبیلین ۱۰ سایلی شؤبه‌سینده کئچیریلن دیندیرمه‌‌ده محکمه ایشچیلرینی دؤیمکده اتهام اولونان جیرال پارک داکی آذربایجان جمهوریییتینده دستک میتینقی‌نین محبوسلاری آغیر گیروو موقابیلینده اردبیل حبس‌خاناسینا کؤچورولدو. . «عسگر اکبرزاده»، «مهدی هوشمند»، «سجاد جولانی»، «حسین بالاخانی»، «مجتبی پروین»، «مصطفی پروین»، «محمد جولانی»، «حامد حیدری باریس»، «بهمن خیرجو»، «پرویز سیابی»، «مرتضی پروین» و «سبحان بخشی»، بو گونه قدر کیملیگی معین‌لشدیریلن و هر بیری اوچون ۵۰۰ میلیون تومان گیروو پولو چیخاریلان ۱۲ حبس ائدیلمیش وطنداش فعالدیر. بو اعتراضچیلارین اتهامی؛ “رهبره ایهانت ائتمک”، “توپلومسال آسایشی پوزماق”، “دؤولت مامورلارینا قارشی عصیان ائتمک و میتینقلرده ایشتیراک ائده‌رک میلی گوونلییه قارشی حرکت ائتمک.” اولاراق بیلدیریلیب.
بعضی توتوقلانان فعاللار عائله‌‌‌لری ایله آپاردیقلاری بیر تلفون گؤروشمه‌سینده بیلدیریبلر کی: “اردبیل ساوجیسی سید عبدالله طباطبایی، توتوقلانان فعاللارین دؤیولمه‌سینی گؤردوکدن سونرا محکمه حکیمی واسطه‌‌‌سی ایله سند‌لشدیرمه‌نی قبول ائتمه‌دی.”
حبس اولونان فعاللارین دئدیگینه گؤره، اردبیللی بیر صنعتچی سجاد جولانی‌نین عومومی وضعیتی کریتیکدیر و اونون موعالیجه‌‌‌سی اوچون هئچ بیر تدبیر گؤرولمه‌ییب.
«احمد محمدپور»، «یاشار مرادی»، «علی معالی»، «یونس مرادی» و «مرضیه جوان‌شیر»، ده اردبیلده کئچیریلن جوما آخشامی میتینقلرینده توتولانلار آراسیندادیر. اردبیلده یاشایان بیر وطنداش فعال «داریوش نیازی شیران»، دا اطلاعات تهلوکه‌‌‌سیزلیک پولیسی طرفیندن توتولاراق نامعلوم یئره آپاریلدی.
محبوسلارین بیر عائله عضوو ایران‌وایره وئردیگی موصاحیبه‌ده دئدی: “قارداشیم هم توتولارکن، هم ده حبسده دؤیولدو. ساوجی‌نین قارداشیمی و دیگر محبوسلاری محکمه حکیمینه گؤندرمه‌مه‌سی میتینقلرده مامورلار طرفیندن زوراکیلیغی دستک‌له‌مکدیر. مامورلارین زوراکیلیغینا گؤره اونلاری هئچ کیمین دیندیرمه‌یه‌جه‌ییندن خیاللاری راحتدیر.”
اردبیلین دیگر شهرلرینده، پارساباددا یاشایان بیر وطنداش فعال «پیمان آقایی»، ۱۰ مهر ۱۳۹۹-جی ایل جوما آخشامی گونو اطلاعاتین تهلوکه‌‌‌سیزلیک قوه‌لری طرفیندن توتولدو و نامعلوم بیر یئره کؤچورولدو.
جوما آخشامی مشکین‌شهرده توتولانلاردان آلینان سون خبرلره گؤره، جناب سیامک سیفی، رژیمه قارشی تبلیغات اتهامی ایله مشکین‌شهر حبس‌خاناسینا کؤچورولدو و ۵۰ میلیون تومان گیروو تعیین اولوندو، جناب کاظم صفابخش ایسه ۳۰ میلیون تومان گیرووو ایله مشکین‌شهر حبس‌خاناسینا گؤندریلدی. حاکم جناب واحید خاوندینی، سیامک سیفی و کاظم صفابخش ایله بیرلیکده داها چوخ سورغو-سؤالا و پرونده‌نین دیگر محکمه‌‌لرده کئچیریلمه‌سینه قدر مشکین‌شهر حبس‌خاناسینا گؤندریلدی. آیریجا بو گونه قدر «احمد یعقوبی»نین هارادا اولدوغو و وضعیتی باره‌ده بیر خبر یوخدور. مشکین‌شهرده توتولان دیگر محبوسلار آراسیندا «مهدی عبادالهی»، «قدرت مناف‌زادگان» و «شهروز همت‌اوغلی»ده براعت آلاراق دیندیریلدیکدن سونرا سربست بوراخیلدیلار.
۲۶ تیر ۱۳۹۹-جو ایل تاریخینده ده آذربایجان جمهوریییتینه دستک اولاراق اونلارلا آذربایجانلی سیاسی، مدنی و اؤیرنجی فعال توتوقلاندی و حبس ائدیلدی.
ایرانلی تورک فعاللار، ایرانین دا روسیه کیمی مؤوقئیی‌نین ارمنیستانی دستکله‌مه‌یه یاخین اولدوغونا و بو سببدن ایرانین آذربایجان جمهورییتینه مؤوقئیینه اعتراض ائتدیکلرینی و آذربایجان جمهورییتنیی دستکله‌دیکلرینی آچیقلادیلار. ایسلام جمهورییتی مسوولاری داغلیق قاراباغ موحاریبه‌‌‌سی ایله باغلی طرفسیز مؤوقئلرینی بیلدیرسه‌لر ده، اعتراضچیلار سوسیال شبکلرده روسیا حربی تجهیزاتینین ایسلام جمهورییتی اراضیسیندن ارمنیستانا کئچدیگینی اعلان ائدن ویدئولار یاییملادیلار.
