بوگون دونیا آنادیلی گونودور و داوام ائدیر گونئی آزربایجانین اؤزگورلوک ساواشی، داوام ائدیر وطنین آزادلیق موجادیله‌سی.
دونیانین بیر چوخ اؤلکه‌سینده قئیده آلینیب قوتلانان گون، ایراندا قئیری فارس میللترلرین حاقلاری‌نین آلینماسینی بیر داها خاطیرلادیر. تورکلوگوموزه باغلی اولان بوتون وارلیقلارا قاداغا قویان ایران عیرقچی رئژیمی، بو ایل ده آنادیلی‌گونو عرفه‌سینده تورک میللتینه اولان تضییقلرینی داوام ائدیب باسغیلارینی آرتدیرماقدادیر.
آرتیق گونئی آزربایجاندا و ایران آدلانان اؤلکه‌ده تورک دیلی‌نین یاساقلانماسین‌دان 96 ایل کئچیر و فارسچی‌لیغا قوللوق ائدن ایران موللا رئژیمی هله‌ده پهلوی‌لرین آنتی‌تورک سیاستینی داوام ائدیب، تورک‌لره و قئیری فارس میللت‌لره فارس دیلینی رسمی دیل کیمی دیکته ائدیر. میلیون‌لارلا تورک اوشاغی گونئی آزربایجاندا و ایران آدلانان اؤلکه‌نین اوخول‌لاریندا آنادیللرینی قیراغا قویوب زورلا فارس دیلینده ائیتیم آلماقدان دولایی روحی ایشکنجه‌لره معروض قالیر، تحقیر اولونورلار. دؤلت اورقانلاری بیله‌رکدن، آزربایجان تورکلرینی سس‌سیزجه اریدیب، ایتیرمگه چالیشیر.
عیرقچی سیاستلرینی فرقلی آراجلارلا حایاتا کئچیرن ایران رئژیمی، میللی فعاللارا قارشی توتدوغو چیرکین توتوملارینی‌دا بوتون کئچه‌ن ایللر کیمی داوام ائتدیرمکده‌دیر. تورک دیلی‌نین مودافیعه‌چی‌لری حبس اولونوب، ایشکنجه‌یه معروض قالیب آغیر حبس جزالاری آلیرلار.
آزربایجان سیاسی قورولوشلاری‌نین امکداشلیق پلاتفورمو، ایران راسیست رئژیمی‌نین قئیری فارس میللت‌لره اؤزل‌لیکله تورک میللتینه قارشی عیرقچی سیاستینی قیناییر، بوتون میللتیمیزی بو یولدا دیرنمه‌گه و گئنیش شکیلده موباریزه‌یه دعوت ائدیر.
کئچن 42 ایلین هر گونو کیمی، ایران رئژیمی‌نین آزربایجان تورک فعال‌لارینا قارشی باسغی‌سی داوام ائدیر. بیز میللی فعاللارا وئریلن آغير حبس جزالارينی شيددتله قينايير، توتساق میللی فعاللارین قئید شرطسیز آزادليغينی طلب ائديريک. میللی فعاللارا وئریلن محکمه قرارلاری درحال لغو ائدیلمه‌لی، اونلاری ایشکنجه ائدیب توتساق ساخلایانلار جزالاندیریلمالیدیرلار.
یاشاسین آزربایجان
یاشاسین تورک میللتی
آزربایجان سیاسی قورولوشلاری‌نین امکداشلیق پلاتفورمو
آذوح - دیرینش – گآدپ
21 فئورال 2021 – 3 اسفند 1399
