آذوح: صابر ادبی انجومنی‌نین اداره هیاتی عضوی جناب «قنبر سیفی»نین اوزون ایللر قاراداغ ماحالیندان توپلاییب قلمه آلدیغی آذربایجان ناغیل‌لاری فولکلور اثری ایکی دیلده چاپ اوچون حاضیرلانمیشدیر. اثرین فارس دیلینده‌کی جیلدی «قصه‌ها و افسانه‌های آذربایجان» (۱۰۰ قصه از منطقه قاراداغ) عنوانی آلتیندا «آواز» نشریاتی طرفیندن یاییلمیشدیر. کیتابین ائدیتورو صابر ادبی انجومنی‌نین دیگر اداره هیاتی عضوی جناب اکبر صالحی(قاداش) و دیزاینری اوختای ساحیردیر. کیتاب تانینمیش آذربایجان ادبی شخصیتی اوستاد «بهزاد بهزادی» جنابلارینا اتحاف ائدیلیبدیر. بو فولکلور اثرینی کیتاب ماغازالاریندان و ائله‌جه‌ده تهراندا فعالیت گؤسترن صابر ادبی انجومنیندن و یاخود یاشماق سیرا کیتاب ائویندن الده ائتمک مومکوندور.
کیتابین آذربایجان دیلینده‌کی جیلدی ده خرداد آییندا «آواز» نشریاتی طرفیندن یاییلاجاقدیر.
آیریجا «قیرمیزیم» آدلی حئکایه توپلوسو چاپ اولدو. بو کیتابا خییولو یازیچی غفور امامی‌زاده‌نین محمود کاشغرلی یاریشماسیندا بیرینجیلییی قازانمیش «قیرمیزیم» آدلی حئکایه‌سیله برابر ۱۰ دیگر قیسا حئکایه‌ده داخیلدیر. کیتاب ۱۱۸ صحیفه‌ده حاضیرلانیب و اونو شهرینیزین کیتاب ماغازالاریندان آلابیلیرسیز.
