گونئی‌آذربایجان یاردیم‌لاشما مرکزینین فعالیته باشلاماسیندان یاخلاشیق ایکی ایل کئچیر و هاردایسا اوچونجو ایلینه گیره‌جک.

بو مرکزین قورولوش آماجیندان هر کسین خبری وار!!! قیساجا بو مرکز حاققیندا یازماق ایسته‌سک :

بو مرکز، گونئی‌آذربایجانین میللی فعاللارا کی ایسته‌مه‌سه‌لرده مجبوری اولاراق دوغما وطنی ترک ائدیب تورکیه اؤلکه‌سینه ایلتیجا ائدیبلر و سیغینماجی دوروموندادیرلار، بیر آزدا اولموش اولسا بیله بو فعاللارین یانیندا دورماق و اونلارا دستک اولماق آماجی‌ایله ایشه باشلادی، تا بلکه یانلاریندا دورماق ایله او سویداشلاریمیز موباریزه‌لرینه داها گوجلو داوام ائتسینلر و زور گونلر اوچون فعالیت‌لری آزالماسین.

بو مرکزین آماجلاریندان بیری ده بو ایدی کی سویداشلاریمیزا حقوقی باخیمدان‌دا یاردیمجی اولسون آما مالسف بو گونه‌دک او قونودا بیر ایش گؤره‌بیلمه‌میشیک. اومود ائدیریک بلکه گله‌جک‌ده بو قونودادا بیر آددیم‌لار آتاق.

مرکزین آچیلیش خبرلری هر یئره گؤندریلدی. بیر سیرا سیته‌لر یایدی و بیر سیرا دا صلاح گؤرمه‌ییب یایمادیلار. دوغروسو، خبریمیزی یایماماقدا بلکه ده بیرآز حاقلی‌ایدیلار. چون کی ریسک‌ایدی، تانینمایان بیری‌سی بئله بیر مرکزی یولا سالمیشدی. بیرحالدا کی بو مرکزین قورولوش آماجی و ایلکه‌لرینین هامیسی نی سیته میزده (حاققیمیزدا بؤلومونده) وارایدی و بو ایلکه و قورولوش آماجلارینا اولاشماق اولاردی، آمما یئنه ده گوونمک اولماز دوروموندا ایدیک بلکه!

زامان کئچدی؛ بو مرکز یاواش یاواش ایشه باشلادی، گوجو یئتدیغی قدر یاردیم گؤندردی و گؤندریلن یاردیملار تک به تک سوسیال مجرالاریندا (یاردیم آلان سویداشیمیزین بیلگیلری گیزلی ساخلانما شرطی ایله) پایلاشیلدی و حالا پایلاشیلماغا دوام ائتدیریلیر.

بیر ایل کئچدی، و بیر ایللیک فعالیتلر اوچون بیلدیری سیته‌میزده و باشقا یوللار ایله پایلاشیلدی، و یئنه آرخا دوران اولمادی. بلکه‌ده حاقلیدیلار، بو زامان دا هئچ کیمه گووه‌ن اولماز سانکی!. آما بیز مرکزی اؤز گوجوموزایله یولوندا دوام ائتمه‌سی اوچون چابالادیق و بو گونه‌ده‌ک آلنی آچیق دوام ائدیریک.

بو گونه‌دک گونئی آذربایجان سیغینماجی‌لار یاردیملاشما مرکزی (SYMGA) اون‌مین(10.000) تورک لیراسی یاخینیندا یاردیمدا بولونوب و اومود ائدیریک کی ائلیه‌بیلمیشیک گوجوموز یئتدیغی‌قدر بلکه بیر یاردیمیمیز توخونموش اولا.

سون سؤز؛ دوغال اولاراق تورکیه‌ده یاشایان بوتون گونئیلی سویداشلاریمیزا اولاشماق شانسیمیز یوخدور. اگر بیزی لاییق گؤروب بیزه یاردیم ائتمک ایسته‌میرسیز، ان آزیندان یاردیما احتیاجی اولان سویداشیمیزا بو مرکزی تانیتدیرین بلکه باشارابیلدیک او سوی‌داشا آزدا اولموش اولسا تورکیه نین بو زور ائکونومی دوروموندا یاردیمجی اولاق.

سایقیلار ایله

سیغینماجیلار یاردیملاشما مرکزی یؤنه تیمی

http://symga.org/

http://symga.org/25-symga-%D9%85%D8%B1%DA%A9%D8%B2%DB%8C%D9%86%DB%8C%D9%86-%D8%A7%DB%8C%DA%A9%DB%8C-%D8%A7%DB%8C%D9%84%DB%8C-%D8%AA%D9%85%D8%A7%D9%85%D9%84%D8%A7%D9%85%D8%A7-%D9%85%D9%88%D9%86%D8%A7%D8%B3%DB%8C%D8%A8%D9%87%E2%80%8C%D8%AA%DB%8C%D9%86%D9%87.html