آذوح: محمد حسن، حبیب اوغلو هرگلی 1320نجی ایلده شهریور آیینین بیرینده محتشم تبریز شهرینین کوچه باغ محله سینده ایشیق دونیاسینا گوز آچمیشدیر.
بو شهرده تحصیلاتینا و ایشه باشلاییر.همن گنج چاغلاریندا آذربایجان موسیقی سینه هوس گوستریر.آمما او زاماندا موسیقی اویره تیمی موسیقی چیلر طرفیندن دب دئییل دیر.
بیرطرفدنده آذربایجان دئموکرات فرقه سی تازا دئویلمیش دی، میللی حوکومت زامانین عکسینه اولاراق، موسیقی خادیملرینین عمومی دورملاری یاخجی دئییل دیر.
حسن آغا دمیرچی ایش و ایدمانلا یاناشی شوروی آذربایجانین هر یکشنبه گونلری رادیو دالغالاری توسط ایله
یایملانماقدا اولان موغام ساعتی وئرلیشینه قولا ق آسیب و منیمسه ییر. بئله لیکله ایللر بویو زحمت و چابادان سونرا موغاماتی اویره نیر .
۱۳۵۷ نجی ایلین اینقلابیندان سونرا نسبی آزادلیغیندان فایدالاناراق، ایلک کیتابینی شاعیر ائلین له بیرلیکده "اودلار دیاریندان آدلار " آدیندا چاپا بوراخیرلار.
سرودلار آدلی کاسئتینی اوز ائوینین زئرزمیسنده آیلار یولداشلاری ایله بیرلیکده مشق و چابادان سونرا ضبط و یایملاییرلار.۱۳۶۰-نجی ایلدن بری اولکه نین قانلی و قادالی ایللرینده بیر حالدا کی، موسیقی فعالیتلری یاساقلانمیش دی. اوز ائوینین زئرزمیسینده و گاراژینین توکانلارین بیرینده هر هفته نین جومه آخشامی لاریندا موغام اویره تیمی نی هوسکارلار اوچون دایر ائدیر۱. بئله لیکله آذربایجان موسیقی تاریخینده ایلک دونه اولاراق موغام کلاسلارینین تمل داشینی قویور و موسیقی میزده دونوش نقطه سی اولور. هابئله میللتیمیزین توی شنلیکلرینده تمنا سیز(پول آلمادان) اوز موسیقی قوروپو ایله ایشتراک ائدیردیلر و سوندا آذربایجان مارشی ایله تویو قورتارارمیشلار. بوایللرده چئشیدلی کاسئتلر او، جومله دن؛ ریتمیک موغاملار،اوشاقلار ین ایفاسی، توی ماهنیلاری، هوشنگ آذراوغلو و .... ضبط و یایملاییر.
۱۳۶۷-نجی ایلده جنگ قورتارییر، موسیقی فعالیتلری آزاد اولور. همن ایلده مکتب آچماق اوچون موغام امتحان ین وئریر و قبول اولونور. آمما موسیقی مکتبین مجوزی نئچه ایل سونرا حورمتلی یولداشی علی آغا خالط آبادی نین چابالاری نتیجه سینده وئریلیر و ۱۳۷۰نجی ایلین سون آیلاریندا آذربایجان آدینا موسیقی مکتبینی آچیلیر. مکتب ۱۵- ایل عومور سورور، بو ایللرده مینلر طلبه موسیقی مکتبیدن قیدالانیرلار. ایندیکی، وار اولان نئچه موسیقی اوستادلاریمیز همن مکتبین کئچمیس طلبه لری اولموشلار.
۷۰-نجی ایللرده بیر نئچه یولداشلار ایله ایللر اونجه دانیشیق و مصلحت دن سونرا " آذربایجان مدنییت اوجاغی"نین تمل داشی قویولور و بو گونه قدر اوجاق عومرونه دوام وئره رک، چوخلو مدنی،ادبی و اجتماعی فعالیت لرده بویوک رولو اولموشدور.
۱۳۸۵-نجی ایلده آذربایجان خالقینا یاراماز بیر توهین دن سونرا عمومی خالق اعتراضلارینا اوستاد حسن آذربایجان دا قاتیلیر.بونا گوره ده توتوقلانیر و سوچلانیر و بیر ایل حبس حوکمو وئریلیر. اوستاد ین وکیلی اولان " نقی محمودی" جنابلارینین چالیشمالاری اثرینده آلتی آی سونرا برائت آلیر و اوستاد آزاد اولونور. آمما موسیقی مکتبی هئچ بیر زامان آچیلماییر. بوندان سونرا کئجمیش ایللر سایاغی جومه آخشامیلار اوستاد دمیرچی اوز ائوینده موغام اویره تیمی نی کلاسینی قورور.
۹۱-نجی ایلده ورزقان زلزله سی اوز وئریر اوزونو تئز ، بولکه یه چاتدیریر. ۱۲آی یولداشلارینین توسط ایله ضرر چکمیشلره یاردیمچی اولورلار. او، جومله ایشلرده ن کی، گورورلر؛ ایکی واحید چوره کچی خانا تیکیرلر، کانئکسلر و چئشیدلی لوازمات پایلانیر و ...
بو چالیشمالاردان سونرا اوستاد حسن دمیرچی توتوقلانیر و آلتی آی حبسه وئریلیر اوزو دئمیشکن، "بو حبسی ده نوش جانلیقلا چکدیک نییه کی، بو یول ملت یولو دور."
اوندان سونرا دا جان آذربایجان دئیه رک، دورمادان چالیشیر، ۹ جیلدلیک کیتاب چاپا وئریر و بئله لیکله جمعی یازدیغی کیتابلار ۱۱ جیلدلیک اولور و هابئله اوستاددان ۴۰-دان آرتیق بسته له دییی آهنگ لر یادیگار قالیبدیر.
حسن آذربایجان همیشه جاندان چوخ سئودییی وطنی اوغروندا چالیشدی، سون واقتلار آذربایجان تورپاقلارینا گوز تیکمیش قووه لر دن نگران قالمیش و سونونجو شعریده شرقی آذربایجان بولگه سی اولان اردبیله عاید "حئیران" گئدیکی حاققیندا سویله میشدی.
نهایت آذربایجانا چیرپینان اوره ک ۹۷-نجی ایلین تیر آیین اوچونده چیرپینماقدان دایانیر و سونکو گون میثلی آز گورونموش قدیر بیلن خالقیمیزین مشایعتی ایله عظیم تشییع اولونور و بیر عومور جان آذربایجان دئیه ن حسن آذربایجان ین جیسمی تبریز توپراغینا تاپشیلیر.
عائله طرفیندن
-----------------------------------------------------
۱- او کیمسه لردن کی،ائولرینین قاپیسی موغام کلاسلارینا آچیقیدی: ۱- آل اکبر بی نظیر و حسن آغا انداچه و رحمتلیک حسین آغا صنوبری ایدیلر.
