ایندی یه دک دونیادا ایکی گونئی لی ، بیری سی آفریقا و ایکینجی سی ده آذربایجان کؤکه نلی سی اولاراق نئچه اورتاق فاکت لارنان برابردیلر . او اورتاق لیق لاری بئیله ساناماق اولار بیلریک .
توپلوما گؤزلرین دیکه رک ، یاشادیقلاری جوغرافیادا سیاسی - توپلومسال دوروم، آپارتایدلا یاناشی شوونیزمی و ژنوسایدلی داورانمالارنان ایچ و دیش سومورگه چیلیگه چکن لر وریندن، میللتلری حاقیدا یورودولمه سینده شاهید اولورلار.. بو اوزره هر ایکی سی میللت ینین آیاغا قالخان سسی اولاراق سومورگه چیلیک ایله زوراکیلیقلارا دور دییه ره ک، اؤنونده دورماغا بوتون هزینه لره رغما جانلا- باشلا چابا گؤستریرلر. قورتولوش و اؤزگورلوک یولچولولاری سونوجدا اوزون چاغلارلا برابر سیاسی دوستاقلارا آتیلیرلار. او ایکی گونئی لی بیری سی "نلسون ماندلا" و بیری سی ده "صفرخان قهرمانیان" دیر.
آنجاق دئدیگیمیز اوراتاقلیق لار ایله اوخشارلیق لاردان علاوه ان اؤنملی فرق لیک لر بو ایکی شخصین یاشامیندا سبب اولور ماندلا دونیایا شؤهرتلی بیر چهره کیمی سرگی له نیب و تانی لا.
ائیله جه کی ماندلا دوستاغا دوشمه میشدن اؤنجه ، دوستاقدا اولدوغو حالدا و دوستاقدان چیخاندان سونرا اؤزونو بیلیم سل لندیره رک چئوره سینده باش وئرن سیاسی و توپلوم سال اولایلاری قاورایا بیلیب. او اوزدن اؤزونو گلیشدیره بیله رک گونده مده ساخلاتدیرا بیلمیشدی. آنجاق، بو تیپ اؤزه للیک صفرخان دا چوخ آز گؤزه چالا بیلیردی.
باشقا گؤروشله ده ماندلانین دوستاقدان چیخماسی نین ندنی بوندان آسیلی دیر کی جبهه داشلارینان تؤکدوکله ری دئوریم چؤزوم له نیب، سونوجا چاتاراق ثمره له نمیشدی. یانی دئمک کی تام ایسته کلی مقصدلرینه یئتیشمیش اولموشدولار. آنجاق، صفرخان نین دوستاقدان چیخماسی بیر باشقا دئوریم له برابر اولدو.
داها دئمک اولار ماندلا عؤمرونون سونونا دک بیر فیکیر جبهه سینده دایانیب و قالاراق ساواش آپاردی. آنجاق، تاسوفلرکی صفرخان قهرمانیان بیر جبهه ده اولماماغی بئله سونوجلاندی کی چئشیدلی چاغداش دا اولان سیاسی فیکیرلر اونو ثبات سیز دوشونه رک یییه له نه بیلمه دیلر.
سونوجدادا یئتیرمک گره کیر کی ایستر – ایسته مز بو گونکو دونیا ، عالی تحصیلات لارا مالیک اولانی بیرینجی دوزومده سیرالاندیراراق یییه له نیر. او اوزدن ده باخساق ماندلا حقوق فاکولته سین بیتیره رک وکیل لیک ایشینه پئشه له نیر. حال بو کو تاسوفلرله صفرخان بو قونودا بوشلوق لا برابریدی.
سون:
یوخاریدا اوزله شدیریجی اؤرنک لرله بئیله سونوجلاندیرماق اولار کی انسان لارین اؤزگورلوک و زوراکیلیق قاباغیندا دوستاق چکمک لری معنوی آچی دان آلقیش لارلا برابر قوتسال اولاراق، مادی باخیم لا انسان لارین گلیشمه ک لری سببی ایله دوستاق چکمک دن چوخ، مدل دوستاق چکمک، ان اؤنملی رول اویناییر.
توتوشدوروجو اؤرنک لری بوتون دونیادا سیاسی حرکت لرینین انسان لاریندا قید ائتمک اولار. ایکی شخصین عینی مدت ده دوستاق چکمک جزالاندیرماغینی تصور ائتسک، بیری سی آنتن کیمی گون آشیری مبارزه آپاراراق سانال ایله گئرچک دونیا گؤروشلرین اؤزونه چکیر. باشقاسیدا عینی مدت لی دوستاغی بیته ندن سونرا اؤزگور اولماق ساوینی دوستاغین سس آنتن یندن ائشیدیر.
بس چوخلو یؤنلرده کیمسه گلیشمه سه (اخلاق، توپلوم سال و... اؤزه للیک له بیلیم سل(رسمی ایله رسمی سیز)) ، سونوجدا حتی دوستاق چمک لری اوزون مدت لرنن اولموش اولسادا توپلومون یادیندان چیخیب اونودولاجاق. ائیله جه کی چوخلو انسان لاردان آد آپارماق اولار کی یاشام لاری نین چوخ حیصه لی بؤلوم لرین سیاسی دوستاقلاردا کئچیرده ره ک ، گلیشمه مه ک قورالی ایله بو گون آدلاری دا یوخ حدینده دیر.
یازار: ابراهیم نوری (ایتگین-قاراداغلی) 1395/11/28
