یوجه تانری نین آدی ایله
بؤیوک آذربایجان اولوسو و سارسیلماز اولوسال چالیشقانلار.
بیلدیینیز کیمی اؤنوموزده گلن گۆنلر اؤلکه‌ده گئدن سئچگیلره گؤره, گونئی آزربایجان میللتینه ان حساس و اؤنملی گۆنلردن دیر.
قوشقوسوزکی کئچمیشده اولدوغو تک بو آشامانی‌دا بو میللتین آییق و ایش بیلن اوغول -قیزلارینین اۆره‌ک, سؤز و دۆشونجه بیرلیگی ایله بٶیوک باشاری الده ائده‌رک آشاجاییق.
آنجاق وورغولانماسیندا یارار گٶرونن بیر نئچه اٶنملی قونو وار.
بیلدییینیز کیمی گونئی آذربایجانین (اٶلکه وی - کۆتله‌وی) باشدان باشاسیندا ائتگیسین قویان بو سئچگیلر دوغال اولاراق, میللی حرکتیمیزین چئشیتلی قوللاری ساریدان, سلیقه و سیاسی گٶروشلر و توتوملارا اویغون یاناشیلماقدادیر و بو دوغالدیر. نییه‌کی اینانیریق میللی منافعین قورونماق شرطیله میللی حرکتین ایچینده, میللی حاقلاری قوروماغا چالیشان بۆتون آخیشلار و باخیشلار, چئشیتلی لیک و پولورالیزمه دایاناراق, اولوسال چیخارلاری قوروماغا حاقلاری وار.
بو گۆن بو تورلو داورانیش وتوتوملار بۆتون گۆنئی آزربایجاندا, یوخاریداکی وورغولانان شرطلرله کئچرلی اولابیلر, تکجه بیر بٶلگه دن باشقا. و او حساس و بۆتون آذربایجانین گٶز بَبَگی اولان باتی آزربایجان بٶلگه سیدیر.
سون ایللرده, کئچمیشدن داها آرتیق دۆنیا قدرتلرینه ابزار و ماشا اولان و اورتادوغویا یازیلمیش آنجاق کسینلیکله سینیغا و یئنیلگییه اوغرایاجاق بیر سناریو و پروژه نین اویغولانماسیندا قوللانیلان متوهیم کۆرد ترور قوروپلاری, تۆرک دۆنیاسینین چاتارقاسی و قیریلماز زنجیرین پاخلاسینین بیری و ان اٶنملی‌سی اولان, باتی آذربایجانا دیش قیجیردیرلار.
ایللر بویو کٶچ و آشیری دوغوب تٶره‌مه سیاستی ایله باتی آزربایجانین ائتنوگرافی دورومون دَییشمکدن اومودسوز اولان کٶچگون و مهاجرلر, یئنه باتی آذربایجاندا میللتیمیزین بعضی کسیملرینین قوناق سئورلیک و خوش گٶرۆلو باخیش و داورانیشلارینا و بوندان داها خطرلی, او بٶلگه‌ده حاکیمییته و سیستمه باغلی, سیاسی-اجتماعی و فرهنگی ساحه‌ده اٶتگوسو اولان بعضی شخصلرین و مسئوللارین, مسئله‌یه میللی منافعه اویغون اولمایان آچیدان یاناشمالارینا گٶز تیکیبلر.
آنجاق بو گرچکلرله بئله, بوگون میللی حرکتین بۆتون گونئی بٶلگه‌لرینده اولدوغو کیمی باتی آزربایجاندادا کۆتله و میللت ایچینده اولان ائتگی و اٶتگوسو دانیلمازدیر و قوشقوسوزکی او بٶلگه ده اٶزللیکله قهرمان سولدوز و گونئی آذربایجانین کولتوره‌ل باش کندی اولان اورمودا بوتون میللی فعاللار او جومله دن تشککوللر, جریانلار, اٶیرنجی‌سل قوروملار, نشریه‌لر هابئله باتی آزربایجاندا ایللر بویو میللی دۆشونجه‌نی یایان دولغون و دَیه‌رلی "آغری نشریه‌سی و سایقی دیه‌ر شخصلرین یۆکسک ایراده سی ایله بۆتون حُبّ و بغضلار و سلیقه تفاووتلارین, بو تاریخی و حساس چاغدا بیر یانا قویوب و دۆشمن گٶزو چیخاردان بیر بیرلیک سرگییه قویاجاقلار. باتی آذربایجانداکی میللی فعاللار بونو بیلملی‌دیرلر, بۆتون گونئی آزربایجانین گٶزو سیز شرفلی اوغول قیزلاریمیزین داورانیشینین سونوجوندادیر. بۆتون آذربایجان بونو یاخچی بیلیر, بیزیم باتی آزربایجان اٶزللیکله سولدوز و اورمودا جمعیت سورونوموز کسینلیکله یوخدور. یانلیز غفلت اۆزوندن رای‌لرین گرکسیز اولاراق داغیلماسی بوتون میللی فعاالارین ان جیددی قایغیلارینداندیر.
آنجاق اینانیریق بو تاریخی برهه‌نی, حساس شهرلریمیزده قازانجلا آشماق ایچین, اورداکی بۆتون میللی فعاللاریمز بیر آرایا گلیب بیر یومروق اولوب و ساغلام بیر لیست وئره‌رک هم آزقین دوشمنی یئرینده اوتورداجاقلار , همده بوگون میللتیمیزین و گلجک نسلین قارشیسیندا اۆزو آغ اولاجاقلار. یوخسا...
عباس لسانی
