تبریزده یوکسک لیسانس دؤره سینی کئچیردنده اونو تئز- تئز مراسیملرده و تاریخی یئرلرده گؤرردیم. آرتیق بیزیم آرامیزدا محدود اولسادا هر کسین اؤیونه بیله جه یی بیر تانیشلیق وارایدی. سئوگیلی دوستلارین بیریله گؤی مسجیدده گزرکن بیریسینین کامئرا ایله فیلمیمیزی چکمه یینی باشا دوشدوم ایره لی گئدیب اوندان کیم اولدوغونو سوروشماق ایسته دیم، باشقا یؤندن گؤلر اوزلو بیر نفر منه یاخینلاشدی و سئوینه-سئوینه منه «بئی کامئراچی بیزلردن دی! انشااللاه گله جکده لئنته آلینان بو سوژئتی آذربایجان جمهورییتی ایجتیمایی تی وی سیندن ایزله یه بیلرسینیز» دئدی. او زامان بو تئله ویزیون هله ائفیره گلمه میشدی. بو ایستکلی وارلیق سایین  دکتر «صمد سرداری نیا»ایدی. البته دئمک ایسته دیییم خاطیره بو دئییلدی.

1385 جی ایلین یاز آخشاملاریندان بیری ایدی. عادت اوزره یاتاقخانانین یاخینلیغیندا اولان شهناز خییاوانیندا گزرکن دوکتورلا قارشیلاشدیم. هدفسیز اینسانلار کیمی آددیملاییردی. سالاملاشدیم! ال وئریب و حالیندان سوروشدوم. سون گونلرده اونو «بارناوا»نین چئوره سینده چوخ گؤروردوم. «دوکتور اؤنجه سیزی بو محله ده گؤرمزدیم! عجبا بو گونلر اؤزه ل بیر ندن سیزی بورایا چکیب گتیریب می؟» دییه سوردوم. دوکتور گوله رک «داشناکلار منی تئلفونلا اؤلومه تهدید ائله ییبلر. اونلارین تهدیدلرینی یادلارینا سالماقچین اؤز آیاقیملا بورا گلیرم. اولسون کی تهدیدلرین یئرینه یئتیره لر. ایندی یه دک بونلارین ماهیتینی قلمله تانیتماغا چالیشدیم، بو دفعه ده قانیملا تانیتسام نه اولور!» دییه جاوابلادی. او بؤیوک اینسانین آغزیندان چیخان سؤزلری حئیرتله دینله ییردیم! قولاقلاریما بئله اینانماییردیم! آخی دوکتورو یالنیز بیر قلم اهلی سانمیشدیم. 

منبع:

http://canazerbaycan.blogfa.com/post/22