اولدوزلار مفتيلين بئلينه قونور،

تيكانلى مفتيل لر آى-ا هؤرونور،

دمير بارماقلاريم چكيشمه سيندن،

پنجره م توتولور ، غمه بورونور.

گرنه شير تومجه لر ، قالخير دوشونجه،

دووارلار دارالير ، قانادلار دونور،

اودقونور سؤزلوك لر، باسيلير سس لر،

قارانليق - ايشيغين قارنينا چؤكور،

ساهات لار قاريشير، زامان كيريخير،

گئجه لر - گوندوزون باغرينى سؤكور،

قارالير نفس لر، آجى يير كؤنلوم،

زامان سانجى لارين، گؤوده مه تؤكور،

بلكه ده يوخودور، ترس آلين يازى،

كؤچوب دونياميزدان، زامانين يازى،

شاختالار، سازاقلار ياللى گئديرلر.

سوسوب ماهنى لارين، سؤزلرى سازى،

كؤزه رير بير تانيش باخيش ايچيمده،

يورغون سئوگى سى ايله جانيما هؤپور،

بورويور دوغماليق سئوينجى منى.

حسرت گؤينه مه لر، قولوم دان قوپور،

وارليغيم اولدوزلو بير آى-ا دؤنور،

قارانليق هارايى ، گؤزومده سؤنور،

چپرلر اؤركه نى ، آرغاجى دوشور،

دووارلار ييخيلير، شفق چيرپينير،

اوچور قابيرقامدان قورتاران قوش لار.

قارانليق ناغيلى قيريلير - سينير،

سيامك ميرزايى  بند 8 - زندان اوين 1396/3/23