نئچه گون اؤنجه، بیرسیرا مجازی گروهلاردا وکاناللاردا، چیرگین واینسانلیقدان اوزاق بیر داورانیشا شاهد اولدوق، کی بنده یه و باشقا میللی فعاللارا چومور آتدیلار*، بو آماجلا کی اوزوده قالماسا ایزی قالسین. ایللر بویودور میللی و ایلکین اینسان حاقلاریمیزین یولوندا یوزلرجه فیکیرداشمیز کیمی چالیشیریق؛ میللتیمیزی و کیملیگیمیزی آلچالتماغا ال بیر اولانلارین اؤنونده دیز چؤکمه ییب وطنین دردینی باغریمیزا باسیب میللتچی آدینی قازانمیشیق.
بو چالیشدیغیمیز یولدا چوخلو توزاقلارا واویونلارا شاهید اولموشوق. عادی یاشامیمیزا هر تورلو انگل اولماغا آددیم گؤتوروبلر. جور به جور تهدیدلرله اوز- اوزه قالمیشیق؛ تحصیلی واجتماعی حاقلاریمیز یاساقلانیب؛ ایشکنجلره ودوستاقلارا معروض قالمیشیق. آنجاق بوتون بونلارلا بئله جان بهاسی ایله وطنی سئومیشیک.و منجه میللتیمیزین ایستکلرینین یولوندا چکدیگیمیز بو چیله لر بیزیم شرف مئدالییامیزدیلار.
بیزیم کیم اولدوغوموزو هم میللت؛ هم قانون مجری لری وهم اونلارکی نئچه ایللر اؤزلرینی قانون یئرینه قویوب بیزی میللتین گؤزوندن سالماغا جان آتیرلار یاخجی بیلیرلر.
۱۳۸۵ ایران آدلی قزئته نین تورک میللتینه ائتدیگی ایهانته قارشی اولاراق باش توتان خرداد قیامیندان اونجه ائوده امنیتی و اطلاعاتی نیرولار طرفیندن توتوقلانان زامان باشچیلارینین بیری منی خیطاب ائده رک دئدیگی سؤز ذهنیمه گلیر: آقای خیرجو تحقیق ائدیب و بیلگیلر اساسیندا سیز مذهبی وحلال حرام بیله ن بیر عائیله دنسینیز، اؤزونوزدن وعائیله نیزدن هئچ بیر خطا ائشیتمه میشیک؛ آنجاق سن ندن میللتچی اولوب و بو کارنامه نی خراب ائتمک ایسته ییرسن. دئدیم میللتین حاقلارینی مطالبه ائتمک هر بیر اینسانین الهی و میللی بورجودور وبو یولدا صداقتله چالیشان میللتچی لر میللتین وجدانینا یول آچیرلار.
ایللر بویو میللی حاقلاریمیزین دیرچلیشی اوغروندا چالیشاراق بیزیم چالیشمالاریمیزا دوشمانلار و دوست کیمی گوستره نلر یئرلرینده اوتورماییب قانونی مطالبه لره قانون یولو ایله اتهام ائده بیلمیینلر چیرگین و اییرنج ایشلری ایله گون به گون گرچک اوزلرینی اورتایا چیخاردیرلار. منجه بونلار هامیسی بیزیم اوچون بیر قازانجیدیر.
۱۳۸۹دا یوکسک لیسانس(کارشناسی ارشد) دا تحصیل آلماقدان محروم اولدوم.۱۳۹۰ دا اورمو گولونون قوروماسیندا مسئوللارین بی تفاوت قالماسینا آیری شهرلرده اولدوغو کیمین اردبیلده ده اولان اعتراضلاردا باشقا میللی فعاللارلا بیرلیکده توتولدوق. او زامان بازجویی اوتاقلاریندا بازجونون دئدیگینی خاطیرلاییرام : ۱۳۸۹دا ستاد خبرییه گلسه یدین بو گون دورومون بو دییلدی. سنجه آذربایجان میللتینه آکادمیک تحصیلاتینی آلان بیر دانشمند لازیمدیر یا سنین کیمی بو گونلری اللری ایله فهله لیک ائدن (آیت)علی خیرجوکی خیاباندا اعتراضا چیخیب شعار وئرمکدن باشقا، الیندن بیرایش گلمیر.
دئدیم کی بیز هم یازیمیز هم شعاریمیز و هم عملیمیز میللتیمیزین حاق سسینی قولاقلارا چاتدیرماق ایچیندیر. بیزیم میللته، میللتیمیزین حاقلارینی دوشونوب ساوونان اینسانلار لازیمدیر دانشمند اولور یا فهله فرق ائتمزهر کس اوز شعور و وسع ی اولدوغو قدر بو میللتین ایستک لری یولوندا آتدیم آتمالی دی. هئچ زامان اونوتمایین بیزیم پیریمیز و ایمامیمیز حضرت علی اولاندا، بیزه ده بو دوشر. او ایمام قابار وورموش اللری ایله قویو قازیب حلال چؤرک قازاناراق عدالت و حاق یولوندا ساواشیردیسا بیزه ده بوتون مقاملارا گؤز یوموب آلین تریمیزله قازانیلان حلال روزی دوشر.
۱۳۹۲ ده اورمو گؤلونون پرونده سینده اردبیلین مرکزی زیندانیندا حبسده اولدوغوموز زامان بیر گون زیندانین رئیسی گلیب هم بندلریمین یانیندا طعنه ایله دئدیگی هئچ بیر زامان یادیمدان چیخمایاجاق « بیلدیگیمه گوره، آقای خیرجو سن بیر اردبیللی سن؛اورمییه گولونون دردینی چکمک سنه دوشوب؟» دئدیم کی: ائشیتدیگیمه گؤره سیز ایران عراق ساواشیندا خرمشهرده جبهه لرده اولوبسوز. دئدی: دوزدو؛ دئدیم: اوردا سنه بیری دئمه دیکی سن اردبیللی خرمشهرده نه ائدیرسن؟ بلی اوگون سنی چکیب اورا آپاران وظیفه بوگونده منه دئییر کی اورموگؤلونون قورودولما فاجیعه سینه اعتراض ائتمک هر بیر آذربایجانلییا گوًره و دیر. سوًز قونوسو ظولمه قارشی دورماقدیرسا، بوراسی داها دوغمادیر
۱۳۹۴ده فیتیله برنامه سینین ایکینجی دولتی کانالدا تورک میللتینه آچیق آشکار توهین وایهانتینه اعتراضدا توتولدوغوموز زامان دادستانین اطلاعات نیرولاری ایله بیرلیکده بازداشتگاها گلیب طعنه لی دئدیگی سؤزو خاطیرلاییرام : «سن بوردا بازداشتگاهدا اولدوغوندا سن بیلن خانیمین هاردادیر؟» دئدیم: بیر دادستانا بو سؤزلر یاراشماز. سیز بیلن حرم دن دفاع ائدنلرین عائیله سی بوگون هاردادیرلار. منیم و یولداشلاریمین عائیله سی، تاریخ بویو بوتون ظولمه قارشی ووروشانلارین عائیله لرینین دوردوغو و اولدوغو یئرده دوروبلار. فقط بونو درک ائتمگه آزاده لیک ایستیر جناب دادستان! سیزه اجازه وئرمه رم بوگون بیزه ایهانت ائده سیز. بوگون میللتیمیزه اولان بو توهین اوره ییمیزی یاندیردی. بیز وجدان بورجوموزو یئرینه یئتیریب اعتراضا چیخدیق. بو میللتین بیریده سیزسیز جناب دادستان! هم سیز و هم اطلاعاتی نیرولاریزبیلسین کی سیزه توتماق بیزه ده توتولماق دوشر آنجاق بوتوتمالارلا قورو قور اوسته توکورسوز وبونلارلا مسئله حل اولمایاجاق. تانری وئرن بیر جانیمیز وار، اونودا زامانی گلدیکده بو میللتین حاقلارینین یولوندا فدا ائتمکده اسیرگه مه یه جیک.
یولداشلار ایللر بویودومیللتیمیزه توهین ائدنلر جور به جور اویونلارلا اهانتلرله میللتیمیزین هویتین داناراق، آزادلیغین الیندن آلماغا چالیشیبلار. تاریخی و اسطوره وی قهرمانلاریمیزا بئله توهین ائتمکدن چکینمه ییبلر. تورک میللتینی آلچالتماغا چالیشان آلچاقلار گئت گئده اؤزلرینین اینسانلیقدان اوزاقلاشیب هر تورلو آلچاقلیغا باش أیمکلرینی گؤرمز اولوبلار. نئجه کی بو گونلر اونا شاهید اولدوق.
بویازییلا افکار عمومی یه چاتدیرماق ایسته ییرم کی مجازی فضادا اولان ایهانتلره قارشی قانون سسسیز قالمامالیدیر و سایبری فضالاردا فعال اولان قانونی ارگانلار گرک ایجازه وئرمییه لر هئچ بیر شهروند حاققیندا توهمت و اهانت اولا. شوکر اولسون تانرییا کی میللتیمیزین اؤنونده هر نه ییمیز اورتادا بللیدیر. اونلار توزاق قوروب اویونلار اوینادیلار. آنجاق بیلمه لیدیلر
وَمَكَروا وَمَكَرَ اللَّهُ ۖ وَاللَّهُ خَيرُ الماكِرينَ **
*: میللتینین ایستکلرینین یولوندا اؤز ایستکلرینه آرخا چئویریب میللتینین اوره یینی قازانان میللتچیلره بو ایهانتلر، یالانلار و قارایاخمالار یاپیشماییب و یاپیشمایاجاق.
** : آل عمران سوره سینین 54 ینجی آیه سی
