۸ مارت دونیا قادین گونو یاخئنلاشماسئنا باخمایاراق نه یازیق کی کیشی ائگمنلیی ایله باشلایان قادینلارا قارشی آیری سئچکلیک سوموروجو- ارتجاعی دولت لر طرفیندن سیستماتیک بیر شکیلده دوام ائتمکده دیر.
۸ مارت تاریخینده قادینلار، آیریمجی سیستمه قارشی باش قالدیرمالاری و سومورو سیستمی دالی آدیم آتدیرمالاری ایله دونیادا قادین حاقلاری اوزره بویوک باشاری الده اتدیلر وداها دوغروسو انسانیت آدینا قازانیلان بیر باشاری دا سایلماقدادیر.
«میللی یول» ، تاریخ و کولتوروموزدن آلدیغی درس لردن یولاچیخان بیر تشکیلات اولاراق بوتون ساحه لرده و او جومله ده قادینلارلا کیشیلرین برابر حقوقا صاحیب اولماسئنا اینانان و ایناندیغینا عمل ائدنلر طرفینده اولاراق بوتون شانلی تاریخیمیزده ، اجتماعی عدالت و اوزگورلوق اوچون مبارزه ائدن قهرمان قادینلاریمیزا ایدئولوژیک فرق قویمادان حرمت ایله یاناشیر و اونلاری میللتیمیزین قیمتلی ملی ده یرلری کیمی گورور.
بیز «میللی یول» اولاراق اینانیریق کی تورک قادینی توپلومسال وسیاسی آچئدان او درجه دوشونجه و درایته چاتمیش کی اگر اوز دیلی ، تاریخی ، وارلیغی و توپراغی اسارتده اولوب غیر رسمی لشدیریلیب و ایکینجی صنف میللت اولاراق معامله گورورسه باشقا میللت لره برابر حقوقلولوق و مجادیله دن سوز ائتمه سی و او یولدا چابا گوسترمه سی نه ایناندیریجی و نه، نهائی هدفه چاتا بیلیر، زیرا حرکت ذاتن اوز ایچینده چئلیشکیلی ( تضادلی ) دیر.
تورک قادینی بونو بیلمیش کی بو گون فارس قادینلاری ارتجاع دان برابر حقوقلو اولمالارین ایسته یب ایکینجی صنف معامله یه معروض قالدیقلارینا اعتراض ائتدیغی و بو ایسته دیک لری حاقلی اودوغو حالده ، غیر فارس اولان قادینلارین دیللرینین ، غیری رسمی لشمه سینه، توپراقلارینین ایشغالینه، تاریخلرینین ساختالاشماسینا و ایکینجی صنف معامله یه معروض قالماسینا قارشی دئیلر کی هئچ بوتون گوجلری ایله راسیست و ایرقچی دوشوننلرین صف لرینده یئر آلیرلار.
ائله بو دلیله گوره آزربایجان تورک قادینلاری ارتجاع- شوونیست و سوموروجولرده ن حقلرینی آلماقلاری اوچون مجادیله ائده رکن میللی کیملیک لرینی اساس آلماقدادیرلار. زیرا بو تحقیرلر ساده جه مستقیل گونئی آزربایجان دئموکراتیک جمهورییتی ایله گئرچکلشه بیلدیغینین بیلینجینده دیرلر.
میللی حاکمیت و میللی دولت، بشرییتین ان سون انسان حاقلاری نین قازانیلان حاق و حقوق لار و البته قادین – کیشی حقوق برابرلیی اوزه رینده قورولان بیرسیستم اولاراق تاریخ و کولتوروموز، اساسیندا بو آیری سئچکیلیگه سون قویاجاق.
قهرمان آزربایجان تورک قادینلاری ، گلین «میللی یول تشکیلاتی»نه قاتیلاراق بوتون نا برابرلیک لره قارشی چین – چینه ارتجاع، راسیست سوموروجو دوشونجه و ذهنیت لره یوخ دئیب ، آزاد و مستقیل دولتیمیزی یاراداراق و گئله جک نسلیمیزه ، آزربایجان انسانینا یاراشان چاغداش بیر یورد تسلیم ائده ک.
هئچ شبهه سیز گئله جک اوزگورلوک آرایان انسانلارین دیر و محقق برابر حقوقلوق برپا اولاجاق...
مرکزی کمیته
ملی یول تشکیلاتی
