یازار: دوقتور جیهون عوثمانلی
چئویرن: آذوح
1- . 10 نویابر 2020-جی ایل نیه ظفر گونودور؟ چونکی آزربایجانین اراضی بوتؤو‌لوگو ایله باغلی اوزون ایللر ایمزالانماسی مومکون اولمایان، حتی بو گونکو اوغورلو شرط‌لرله ایمزالاناجاغی آغلا گلمه‌ین بیاننامه محض بو گون ایمضالاندی. سوال ائدیرسینیز کی، بس او زامان تماس خطی ندیر؟ ائله او سوال‌دان باشلاییم کی، بورادا صحبت آذربایجان اراضی‌لری داخیلینده آذربایجان و ائرمنیستانین اوردوسونون تماس خطین‌دن گئتمیر. چونکی ائرمنیستان اوردوسو آذربایجان اراضی‌سینی ترک ائده‌جک. آرتیق بو گون ساعت 07:00دان اعتباراً ائرمنیستان اؤز قوشون‌لارینی چیخارماغا باشلاییر. تماس خطی دئیرکن بورادا صحبت داها چوخ اینسان‌لار آراسیندا تماس‌دان گئدیر کی، بیرگه یاشایارکن تهلوکه‌سیزلیک ماکسیموم تامین اولونسون.
2- سوال وئریرسینیز کی، نیه گؤره روسیا اوردوسو تهلوکسیزلیگین قارانتینی اولما‌لی‌دیر؟ جناب پرئزیدئنت وورغولادی کی، بیاناتین 5-جی مادده‌سینه اویغون اولا‌راق هم روسیا، هم ده تورکییه طرف‌لرین اؤز عهده‌لیگی‌نین ایجراسی‌نین مونیتورینقینی حیاتا کئچیره‌جک. یعنی هر هانسی بیر طرف اؤز عهده‌لیگینی یئرینه یئتیرمه‌سه روسیا کیمی، تورکییه‌نین ده موداخیله ائتمک ایمکانی اولا‌جاق. بو ایسه فاکتیکی اولا‌راق ایللر سونرا ایلک دفعه 2+2 یعنی آذربایجان، ائرمنیستان، روسیا، تورکییه فورماتی‌نین رسمیته دوشمه‌سی دئمک‌دیر.
3- دئییرسینیز کی، پاشینیان دئییب کی، آرتساخ اؤز ایشینه داوام ائدیر. پاشینیان غلط ائدیب، باشینی دا دیوارا ووروب. هانسی آرتساخ؟ ایللر بویو ائرمنی‌لر اؤز قوندارما رئژیم‌لرینی دانیشیق‌لارین طرفی کیمی سیریماق ایستییردی‌لر. سیز بوش دانیشیق‌لارا یوخ، سنده باخین. سندده آرتساخ یوخ‌دور و هئچ واخت دا اولا بیلمز. آرتساخ ادعاسی آنجاق سارساخ‌لارین لئکسیکونوندا یاشاماغا داوام ائده بیلر. نورمال آدام‌لار اوچون بئله آنلاییش یوخ‌دور.
4- بو گون ایمزالانمیش بیاناتی بو گونه کیمی موذاکیره اولونان هئچ بیر سندله موقاییسه ائتمیین. چونکی بو آزربایجانین قالیبیت سندی‌دیر. ایندی بو سندی دیگر سندلرله موقاییسه ائده‌جم.
ایللر بویو دانیشیق‌لار گئدیردی. آتت-این مینسک قروپو یوزلرله گؤروش کئچیرمیشدی. مین بیر عذاب اذیت، تضییق، ایکی اوزلو یاناشما‌دان سونرا بیزی تام قانع ائتمه‌سه ده مادرید پرینسیپ‌لری‌نین اوزرینده دایانیلمیشدی.
مادرید پرینسیپ‌لرینی ایسه ائرمنی‌لر پوزدو و دئدی‌لر کی، بو ائرمنی‌لرین ماراق‌لارینا اویغون دئییل. اورادا دئییلیردی، کی، داغ‌لیق قاراباغا آیدیاتی اولمایان 7 رایونون 5-نی قایتاریرلار، 2 رایونو 5 ایل عرضینده قایتاریرلار، لاچین کوریدورونون ایستاتوسو موذاکیره ائدیلیر، داغ‌لیق قاراباغا ایسه آذربایجان ایجماسی کؤچن‌دن سونرا رئفئرئندوم کئچیریله‌جک و داغ‌لیق قاراباغین ایستاتوسو موذاکیره ائدیله‌جک ایدی. ناخچیوانا کوریدوردان ایسه صحبت بئله گئتمیردی. حتی بیزیم اوچون بئله آغیر شرط‌لره ائرمنی‌لر راضی اولموردو.
بو گون ایسه نه باش وئردی؟
داغ‌لیق قاراباغا آیدیاتی اولمایان 4 رایون ایشغال‌دان آزاد ائدیلیب (جبراییل، فضولی، قوبادلی، زنگیلان)، 3 رایونو دا گئری قایتاریرلار (لاچین، کلبجر، آغدام) یعنی اطراف 7 رایونون مسئله‌سی آیدین اولدو.
ایندی ایسه داغ‌لیق قاراباغا عایید اولان 5 رایون باره‌ده:
داغ‌لیق قاراباغ اراضی‌سین‌دن ایسه شوشا ایشغال‌دان آزاد ائدیلیب. ایندی داغ‌لیق قاراباغ اراضی‌سین‌دن خانکندی، خوجاوند، عسگران، آغدره ایله باغلی سوالا جاواب وئره‌جم. خوجالینی دا سوروشورسونوز اما خوجا‌لی آیریجا رایون دئییل. خوجا‌لی عسگران رایونوندا یئرلشن اینضیباتی مرکزدیر.
بیر قروپ اینسان ائله باشا دوشوب کی، سانکی خانکندی، خوجاوند، عسگرن، آغدره‌ده ائرمنیستان اوردوسو قالا‌جاق. بو سهو آنلاییش‌دیر. ائرمنیستان اوردوسو بو اراضی‌لری ده ترک ائده‌جک. ائرمنی‌لرین ده بو رایون‌لاردا هئچ بیر خصوصی ایستاتوسو اولمایا‌جاق. اونلار آذربایجان وطنداشی اولماق‌دان ذوق آلما‌لی‌دیرلار!
5- باشقا بیر اؤنم‌لی مسئله ده وار کی، آذربایجان قوشون‌لاری هارادا‌دیرسا اورادا دا دایانیر. هئچ بیریمیزه سیر دئییل کی، قوشون‌لاریمیز خانکندی، خوجاوند، او جمله‌دن عسگران و آغدره‌یه نظارت ائدیرلر. بیاناتا اساساً اونلارین اؤز یئرینده قالیب بو نظارتی داوام ائتمه‌سینه انگل یوخ‌دور. ائرمنیستان قوشون‌لاری ایسه اورا‌لاری ترک ائدیر.
6- جناب پرئزیدئنت دئدی کی، داغ‌لیق قاراباغ ائرمنی‌لری اوچون هئچ بیر ایستاتوس موذاکیره مؤوضوسو دئییل. بو او دئمک‌دیر کی، داغ‌لیق قاراباغ اوچون خصوصی موختاریت نظرده توتولماییب. یعنی خانکندی‌نین ایستاتوسو دا برده ویا ترتردن فرقلنمه‌یه‌جک. ساده‌جه رئال‌لیق اوندان عبارت‌دیر کی، بو شهرلرده یاشایان ائرمنی‌لر آز اولماییب.
خصوصیله ده خانکندیده ائرمنی اها‌لی‌سی چوخلوق تشکیل ائدیب و بئینلخالق حقوقون و کونستیتوسیامیزین طلب‌لرینه اویغون اولا‌راق بیز اونلاری اورا‌دان قووا بیلمریک (بئله نیتیمیز ده اولماییب) و اونلارا آذربایجان قانون‌لاری‌نین وئردیگی بوتون ایمکان‌لاردان فایدالانماسینا شرایط یاراتمالیییق. البته کیم آذربایجان پاسپورتونو قبول ائتمک ایستمه‌سه دونیانین ایستنیلن اؤلکه‌سینه یولو آچیق‌دیر.
7- شخصاً منی بو آرا‌لار ان چوخ دوشون‌دورن مسئله‌لردن بیری او ایدی کی، خانکندینه آذربایجان اوردوسو گیرسه ایدی یقین کی، ائرمنی‌لر آرتیق موختلیف پروووکاسیا‌لار هازیرلامیشدی. مثلا یئرلی اها‌لی‌دن 40-50 نفری اؤزلری قیریب آتاردی‌لار آذربایجان اوردوسونون اوستونه. سونرا دا قویما-هارای سالیب ایکینجی سومقاییت سهنجیگی قورا بیلردی‌لر. اونا گؤره ده بئله مسئله‌لری نظره آلا‌راق موشاهیدچی‌لرین موشاییتی ایله اورا گیرمک بلکه ده داها مصلحت‌لی‌دیر.
8- سوروشورسونوز کی، روسیا صولهمرام‌لی‌لاری گلمه‌سه اولمازدیمی؟ گلین صمیمی اولاق. اونوتمایاق کی، دونیانین ان قلیز دوشمنی ایله محاربه آپاریریق. سیزلر ده سوال وئریرسینیز کی، بیردن ائرمنی‌لر شرط‌لری پوزدو... باخ ائله همین مقامدا پوتین اورا ایمضا آتان طرف‌لردن بیری کیمی اؤز ایمضاسی‌نین آغیرلیغینی خاتیرلاتما‌لی‌دیر. هم ده روسیا داها چوخ پاترول فونکسیاسی یئرینه یئتیره‌جک و قاراباغا آغیر سلاح‌لارلا گلمه‌یه‌جک. هم ده اونوتمایاق کی، روس صولهمرام‌لی‌لاری روسیا اوردوسو ویا روسیا حربی بازاسی آنلامینا گلمیر. تام فرق‌لی آنلاییش‌لاردیر.
9- لاچین کوریدورونون ایسه هئچ بیر خصوصی ایستاتوسو اولمایا‌جاق. بو کوریدور آذربایجان اراضی‌سی‌دیر. ساده‌جه ائرمنی‌لرین داغ‌لیق قاراباغ‌دان ائرمنیستانا و عکسینه تهلوکه‌سیز گئدیش-گلیشی تامین ائدیله‌جک. بورادا غیرعادی هئچ نه گؤرمورم، چونکی اونسوز دا آزربایجانین بو کوریدورو ائرمنی‌لرین اوزونه باغلاماق کیمی بیر نیتی یوخ ایدی.
10- ناخچیوانلا گئدیش-گلیش کوریدوروموزون اولماسی و روسیانین بونو قوروماسی و ضمانت وئرمه‌سی ایسه رئگیونال اهمیت‌لی بیر اوغوردور. بو یول‌دان تک بیز یوخ بوتون رئگیون فایدا‌لانا‌جاق. بو یول تورکییه ایله آذربایجانی، عینی زاماندا تورکییه ایله روسیانی بیرلش‌دیرن ان قیسا قورو یولو اولا‌جاق. تورکییه‌دن اورتا آسیایا گئدن یوک‌لر ده داها قیسا واختدا اونوانینا چاتمیش اولا‌جاق. بو اوغورو دا تاریخی ظفر آدلان‌دیرماق اولار.
