اردبیل
عصیرلردیر بیر آغیر ماتم توتارکن اؤلکه نی
مات قالیب بو ماجرایا درک و ابیان، اردبیل
وطن اولموش بحر غم ماتم سرای هر بلا
گؤزلریندن یاش آخارکن کؤنلو بریان، اردبیل
اولموسان بیگانه لر تمثیلی کندیندن اوزاق
دوشدو گؤزدن ملّتین بیچاره انسان،اردبیل
سانکی فرمان قدر حکم ائله ییبدیر ذللتی
زار اولوب مینلر اوره ک محزون نالان،اردبیل
چاره سیزدیرملّتین دوشمان الینده عصیرلر
گل گؤزوم بیرده داها اؤز خلقینه یان،اردبیل
دوشدو یادلار حیله سیله اؤلکه بو محنتلره
ائل لرین اولدو نئجه بیهوده قوربان، اردبیل
وئرمیسن مینلرله جان بیگانه اوغروندا یئتر
وئر داها بیرده گؤزوم ائولادینا جان، اردبیل
کوروشون حتا حسینین دخلی یوخ بو ملّته
نسللردیر اولدو باغیرن گؤرنئجه قان،اردبیل
هرشئییین بیرحدّی وار حتا محرّم اولسادا
وارلیقین ایسلام یولوندا اولدو تالان،اردبیل
یادلارا ماتم توتارکن عصیرلر زار اولموسان
یوخمو سنده قهرمان؟ائولادینی آن،اردبیل
2.
قهری عاشورا مصیبت بو قیامت وای شیون
ائتدی کندیندن اوزاق انسانی ویلان،اردبیل
گل باریش اؤز تاریخینلا بیرده یان اؤزخلقینه
دیل و تاریخ کیملیینده اولدو هیجران،اردبیل
آغلادین ایللرحسینه بیتمدی گؤز یاشلارین
کندینی مغبون ائدرکن قهر و نسیان،اردبیل
ماجرای سئوگی چون اسرار اولوبدور ملّته
چؤزمه ییر حتّا زمان بو سیرّی ادیان،اردبیل
داستان کربلا گر قدرت و عشق اوسته دیر
اُورینب دیر بانی بو جنگ و جولان، اردبیل
عاشیق اولموشدو یزید بیر ماه پیکر دیلبره
گئده رک صبر و قراری همده برهان،اردبیل
معاویه حیله ائده رکن قیزینا ائلچی توتوب
ائشینی رد ائتدی گویا ابن سلمان،اردبیل
بو اومودلا تا یئتیشسین وصل بنت معاویه
بارگاهی تخت و تاجی ملک عدنان،اردبیل
فرصت اولدو بو حسینه اورینبله باغلاسین
صیغه مهر و محبت عهد و احصان، اردبیل
ماجرای عشق وعاشق چونکو دیللرده گزَر
چکمه دی گویا بو سیرّه پرده ازمان،اردبیل
3.
بولوشارکن چون یزیدین دیلبریله تا حسین
قاینادی سانکی یزیدین قانی بیر آن،اردبیل
معاویه پیغام ائدیب گویا حسینه سؤیلدی
اورینبدن ال گؤتور ختم ائله جریان، اردبیل
اورینب فیکرینده تامجنون اولموشدو ایمام
خانمانی اولدو برباد همده محزان، اردبیل
معاویه امر ائله ییب لشکر تؤکرکن یوللارا
کربلانی جنگ قدرت توتدو بحران، اردبیل
وئرمدی چونکو یزیده بنعلی دیلداده سین
قدِّ رعنایا ساریلدی سانکی پروان، اردبیل
داستان کربلانین سئوگیدیر چون قایناقی
تا حسین دیلبر یولوندا اولدو جاندان،اردبیل
بنزه ییر بو ماجرا گویا قُطامین عشقینه
ابنمجلم علییه سالدیردی غفلان، اردبیل
اوندا کی جنگ خوارج نهرواندا باشلادی
اؤلدو لر مین لر خوارج یار و اعوان، اردبیل
قتل اولوندو قارداشیلا آتاسی قطامه نین
ایسته ییردی قانا قان حتا نچندان، اردبیل
ابنملجم عاشقییدی تا قطامین حسنونه
بو گؤزه للیک کربلادا اولدو سلطان،اردبیل
4.
شرط قیدائتدی قطام گویا وصال عشقینه
بیرکنیز اوچمین دینار علینی قتلان،اردبیل
ابنملجم ماجراسیلا قطامین سئوگیسین
ثبت ائدیب بو داستانی جرج زیدان،اردبیل
معاویه همده ابوبکر و یزید تا کی حسین
هامیسی فامیلدیلر تا علی عثمان،اردبیل
خلفا راشدین گر قدرت اوسته جنگ ائدیب
سن نییه ایللر بویو ماتم توتوبسان، اردبیل
یوخمو مخلوقون قراری اونودارکن کندینی
فکری ذکری کربلادیر حج و شعبان،اردبیل
باشقا ملّتلر ترقی اینکشاف فیکرینده دیر
اولموشوق بیزده مصیبتله آلیشقان،اردبیل
سانکی بو ماتم مصیبت بیر قدر دیر ملّته
اؤلکه اولدو گؤر نئجه شام غریبان، اردبیل
حکم ائده رکن مللته قهر و قدر فقر و کدر
گؤتوروبدور باشینا بو شهری هذیان،اردبیل
موتلو گونلر یئرینه تامین اولوب عاشورامیز
سالاراق ماتم مصیبت ائلی کاردان،اردبیل
بورونوب شیعه کفن خنجر الینده باش یاریر
جاهلیت اولدو یوخسا خلقه عظمان،اردبیل
5.
آغلایارکن اؤلکه قان شاققیلداییر زنجیرقمه
مات قالیب دیر کائنات بو امره کیهان،اردبیل
تعزیه توتدون حسینه آغلاماقدان دویمادین
بولمادی گؤز یاشلارین بیهوده پایان، اردبیل
کیم دوشونمز کندینه مجنون اولارکن یادلارا
قارا سئودادیر مگر چیخمیر یادیندان، اردبیل
اونودارکن کندینی خلقین دوشوب محنتلره
حصر اولارکن یادلارا گوندوز اوباشدان،اردبیل
ماجرای کربلا گر قدرت و عشق اوسته دیر
بس ندن ماتم توتوب بیر عده نادان، اردبیل
کربلانی بازار آچمیش منبراوسته روضاخان
آغلاییر بو اؤلکه نین حالینا ویجدان، اردبیل
دیو و دد ریضا پالانی اوغلو ممّد تا خمئین
ائتدیلر بو اؤلکه نی مخلوقا زیندان، اردبیل
قتلینه فرمان وئریب ایسلام آدیلا قان تؤکن
ییخدی بوخلقین ائوین مینلرله بنیان،اردبیل
بیر طرفدن عیش و نوش اولدو اؤلکه یادلارا
اؤته یاندان آغلاییر یوخسول آجیندان،اردبیل
کربلادا جوت قبیله گر ائدیب جنگ و نزاع
عصیرلردیر سن نییه آغلار اولوبسان،اردبیل
6.
بو ساواشدا قان تؤکوبلر چون یزید و معاویه
سن بنی هاشم میسن یاابنسفیان،اردبیل
اؤز نیگاریندان دوشرکن آیری ایللر خاطیرین
وصل دیلداری بولار عشقی اونودان، اردبیل
گؤرموسن قان آغلاییر جلّاد الینده بو وطن
گؤیله ره قالیب بوتون فریاد و افغان، اردبیل
دیکتاتورلار چاپدیلار ایسلام آدیلا اؤلکه نی
نئج اولوب بابک لرین عصیانا قالخان، اردبیل
چوخ طلبکار اولدو تهران چاپاراق بو اؤلکنی
ائللرین قانین سوموردو او سومورقان،اردبیل
مملکت جلاد الینده اولدو چون ظولماتخانا
ظلم الیندن زاراولوب انسان هراسان،اردبیل
حکم اعدام و جزا مرسوم اولارکن داشقالاق
اؤلکه زیندان اولدو خلقه ملّا دیژبان، اردبیل
محو اولوندو موسیقین حتا دیلین و تاریخین
سوسدورارکن اؤلکه نی غدّار تهران، اردیبل
یئرلرین میدانلارین اصلی آدین حذف ائتدیلر
قالماسین تا اؤز دیلینده بیر خیاوان، اردبیل
جوته قوشدو ملّتی ایران آدیلا شاه و شیخ
سؤیله یرکن انکیشاف خلقه یالاندان،اردبیل
اعتبار ائتدین گؤوندین سنده بو دوشمانلارا
جان وئره رکن ایل یوز اولدو قاناغلتان،اردبیل
7.
ائتدیلر خلقی بؤجک "ایران قزت" تهرانچیلار
فخر ائدرکن کوروشا اؤلکه ده میدان، اردبیل
بوغدولار آزادلیقی ایران آدیلا شاه و شیخ
قان تؤکرکن آسدیلار مللتی داردان، اردبیل
قوجاق آچدین تهرانا باخدی سنه بیگانه تک
یادلارا بئل باغلاییب اولدون پشیمان،اردبیل
اولمیاگؤزدن سالارکن کندینی هم خلقینی
اولموسان بیگانیه معشوق جانان، اردبیل
هاجری همده کور اوغلو نبی هم بابکلری
اونودارکن اولموسان یادلارا حیران، اردبیل
نه یاتبسان دور اویان ائللر داها فریاد اولوب
کؤهنه استعمارا قارشی کلّی ایران،اردبیل
ثروتین تاراج اولارکن سولارین پایمال اولوب
ائتدی تهران اؤلکه نی دوزلو بیابان، اردبیل
مللتی ایللر چاپارکن آیت الله شاه و شیخ
اولدولار بو مفتخورلار خلقه دوشمان،اردبیل
سن ایناندین تهرانا آزادلیقی جار ایله سین
قویدولار ایللر پالان مخلوقا چوخدان، اردبیل
یادلاری باشتاجی ائتدین سورمادین حتّاندن
کاخ عؤمرون کیملیگینده اولدو ویران،اردبیل
8.
اهلی ایمانسان اگر بوش وئر تظاهر منبری
همّت ائد اؤز خلقینه بیرلیگی ایمان، اردبیل
اولماسا اردون اگر مرکز حساب ائتمزسنی
چوخ چکیبسن یاد الیندن بو جفادان،اردبیل
طنز آدیلا ایله دی تهران تمسخر لهجه نی
نفرتی باشدان آشارکن یوخ اونا مان،اردبیل
سایقی دویماز ملّته تهران فالانژ ایرانچیلار
خلقینی تحقیرائده رلر حتا بؤهتان، اردبیل
ملّته آلچاق باخارکن عیرقچی کوروشچیلار
ظّن ائده رلر اؤزلرین اؤلکده باشقان،اردبیل
سانکی رمّال و دیلنچی اونودوبدور تاریخین
اوندا کی تاپمیردیلار یاتماقا یورغان، اردبیل
ایندی ایران اولدو چون ساللاقخانا قاتیللره
بکله مه انسانیت خلقی آساندان، اردبیل
بابکین ایللر بویو عصیان ائده ردی ظالیمه
ایسته مزدی اؤلکنی زورلامسلمان،اردبیل
قتل اولوندون جبهه لرده لشکر عاشوراتک
گؤزیاشین ایللرآخارکن اولدو سیلان،اردبیل
جان فداائدین بو یولدا بس هانی آزادلیقین
هرشئییین ایران یولوندا اولدو تاوان،اردبیل
9.
ائتدیلر عاشورانی کولتور بو خلقه مولّا لار
اولمادی منبر مصیبت درده درمان، اردبیل
موسیقین اولدو حارام اسلام آدیلا وارلقین
اولدو حتا آد یاساق مخلوقا عنوان، اردبیل
ملّته باسقی سالارکن تهران اولدو اژدها
ائتدیلر بو اؤلکه یه شرٍّی نیگهبان، اردبیل
ستم آلتیندا سیخیلدی ملّتین یوزایل داها
تاپمادی بودرده چاره اؤلکه ساهمان،اردبیل
خنجر آلدی چیینینه ایسلام آدیلا قان تؤکن
ال کسرکن قورخو اولدو خلقه اکران،اردبیل
مددوشرکن داشقالاق قتل وجنایت اؤلکده
کسدی تهران ملتّی حکم جماران، اردبیل
ساتدیلار داغداشلاری مرمرقیزیل معدنلرین
چاپدیلار بو اؤلکنی محو اولدو استان،اردبیل
خلقینه تحمیل ائدرکن حدّن آرتیق وئرگیلر
بئله وئرگی وئرمه ییر حتا خراسان، اردبیل
مظهرقتل و جنایت اولدو ایران شاه و شیخ
مملکت توتدو فلاکت قهر و اجنان، اردبیل
کسدیلر چون دیللری محو ائتدیلر مکتبلری
اولماسین تا اؤز دیلینده بیردبستان،اردبیل
10.
دیللرین آزادلیقی قانوندا ثبت اولموش اگر
بوردا حاکم دیلکسندیر اؤلکه ظلمان،اردبیل
سککیز ایللیک جنگله زار ائتدیلر بو اؤلکنی
گؤرسه درکن اؤزلرین خلقه مریدان، اردبیل
یادالیله غصب اولارکن چون کتابخانن بوتون
غارت اولدو تاریخین ارکی صفیخان، اردبیل
خلقینی امّت آدیلا جبهه لرده محو ائدیب
روضاخانلار یئدیلر مسجیده احسان،اردبیل
یئم ائدرکن حاکمیّت جبهه ده مینلر جاوان
مولالاردان وعده گلدی حور غلمان، اردبیل
سورمادین بوحیله بازلاردان یوز ایللردیرندن
بو نه اوضاعدیر فلاکت بو نه دؤوران، اردبیل
اؤز دیلین اولدو یاساق بیگانه امریله مدام
فخر ائدرکن فارسیا غم توتدو اذهان،اردبیل
اؤلکه توتدو چون خزان محو اولدو آثار باهار
یاندی بو ظلمون اودوندا باغ وبستان،اردبیل
خلقینه لشکرچکرکن شاه وشیخ ایرانچیلار
چوخ جنایت ائتدیلر اؤلکه ده هر آن، اردبیل
اود ووروب یاندیردیلار میداندا تونقاللار کتاب
قالماسین تا اؤز دیلینده بیر کتابدان،اردبیل
11.
قان آخیب دیر لاله گولدن بوغدولار آزادلیقی
غم توتارکن اؤلکنی یاندی گولوستان،اردبیل
ایران اولدو بیر جهنّم خلقی محبوس ایلدی
ساخلایارکن ملّتی تهران گیرووگان، اردبیل
اولماسا بو دیکتاتورلوق اولماز ایران بیر داها
ساخلاییبلار خلقدن بو سیّری پنهان، اردبیل
عصیرلر دیر مللته دایم قورولموش نقشه لر
قهر و عصیاندیر نجات بو خلقه میزان، اردبیل
بیرلیگی هم کیملیگی معیار ائدرکن خلقینه
یوخ داها اونسوز سنه ایمداد وایمکان،اردبیل
تهرانا تمکین ائدرکن یاد کیمی باخدی سنه
آنا یوردوندا سنی ظّن ائتدی مهمان، اردبیل
غصب اولارکن ثروتین تهران الیله حیف ومیل
یوخسول آج قالدی اؤلکه یادلارا کان، اردبیل
یالوارارکن تهرانا لطف ایله سین شاید سنه
اؤز دیلینده بیر اوخول بلکه آچارسان، اردبیل
ایل یوز اولدو بکلدین ایللر دیر ظالیمدن کرم
نه زمان ائتمیش کرم مظلوماشیطان،اردبیل
کؤله ائتدی خلقینی یوز ایل پانیران محفلی
دیلینی اینکار ائدرکن خلقی کتمان، اردبیل
12.
قان تؤکرکن شاه وشیخ ایران آدیلا دویمادی
چون راسیسم اولدو اونا ابنا و ارکان،اردبیل
فتنه جهل و ریادان باغرین اولدو چونکو قان
گون گلر فریاد اولار بو اؤلکه طغیان، اردبیل
مظلومون آهی توتار بیرگون ستمکاری اگر
محو اولار کاخ جلالی یئرله یکسان، اردبیل
دردینی سؤیلر قلم ایللردیر بیتمز حسرتی
ای آنا یوردوم وطن ای ملکی احزان،اردبیل
بیرلیگین اولدو پارامپارچا دیلینتک کیملییین
ایندی اول اؤز حالینا آغلار پریشان، اردبیل
ایختیارین اولماسا تا اؤز الینده غصب اولار
جان و مال و ثروتین هم کلّی امیان،اردبیل
یومما گؤز محنت لره حیرمان و بو حسرتلره
گون گله ر فریاد اولار هیجرانا دیوان، اردبیل
رمزعشقین سحر ائدر ایللر وطن ائولادینی
صبر ائدیبدیر آستارا حسرتله حیران، اردبیل
تاریخین میثاقیسان مین ایل لره آتدون تمل
خانلارین خاقانیسان یوردوندا خاقان،اردبیل
ظولماتا لرزه سالار بو قهرمانلار اؤلکه سی
چونکو آزادلیقلا ائتمیش عهدو پیمان،اردبیل
دیک دورار توفاندا داغلار فخر ائدرکن گؤِیلره
ظولماتا ایمه ز بویون اودلو ساوالان، اردبیل
ده ده قورقوتدان اوغوزخاننان گلندیرتاریخین
سن کوراوغلو ائلیسن ایگید قوجامان،اردبیل
یئر توتارکن مللتین ان زیروه سینده تاریخین
شهرتین دیر ایمپراتور شانلی آلپان، اردبیل
ساوالان توفانلیدیر وئرمیش سهندله ال اله
ائللرین فریاد اولوبدور سانکی ولکان،اردبیل
دویموشام توفان یئلین پیغام ائدیبدیر زمزمه
صبح آزادلیق یاخیندیر ظلمه عصیان،اردبیل
24.01.2025
