شهید مهندس غلامرضا امانی نین خانیمی سایین "گونش خانیم امانی" ،میللی فعال مرتضی مرادپورون آجلیق آکسیاسی حاقدا یازدیغی یازی
عمی نوه م جوان ایدی، چوخ جوان. بو جوماآخشامی قیرخ گون دیر دونیاسینی ده ییشیب، اوشاق لیقدان ناخوش ایدی، نهایت ده 22 یاشیندا اؤلوم خبرین ائشیتمک چوخ اوزدو منی. اوشاقلار قول_قانادیما دولاشیردیلار:
_آنا نه اولوب؟ نییه دانیشمیرسان؟
_هئش زاد اولمویوب، بیرآز داریخیرام آراز.
_آنا هارا باخیرسان؟ نییه بیر زاد یئمیرسن؟
_آج دییلم دنیز، سیز شامیزی یئیین قیزیم
_آنا دئمه سن نه اولوب بیز شام یئمییه جاغیق!
آخیرده دؤزه بیلمه دیم هوکورتمه چالیب آغلادیم:
_آراز مرتضی گئتدی آللاهین یانینا، مرتضییا گؤره آغلییرام. دنیزیم منن ایشیز اولماسین اؤزومو تاپیم…
اوشاقلار شاشیب قالدیلار، ائ وای آنا سن آللاه دئ یالان دییرسن، آنا او چوخ جوان ایدی. دنیزین گؤزونون یاشی دورموردو، آرازین حالی خوش دییلدی. دئدیغیما پئشمان اولدوم. باشلادیم اونلاری دیله توتماغا باغریما باسیب:« اولسون عوضینده او چوخ اینجیمیشدی، راحاتلاشدی، او بیر قوش اولوب جنته گئتدی»…
اما اوشاقلار ساکین اولموردولار. چوخ تعجب ائله میشدیم. آخی اونلار منیم عمی نوه می گؤرمه میشدیلر، نییه بو قدر اونون اؤلمه سیندن ائتگی لنیبلر؟ آنجاق اونلاری یولداشلاریمین بیرینین یانینا قویوب اورمییه یه گئتمک گرکیردی. یولداشیم منی ساکین لشدیریردی اما من:« بیلمیسیز کی نه گؤزل ایدی، بیلمیسیز کی، اونون هر آرزیسی گویلونده قالدی….» دئیه آغلییردیم. بیردن بیره آراز اورتایا گیردی:
بیز اونو چوخ سئویردوخ
دنیزده دولوخسونوب دئدی: اوقدر زنداندا بیله سینی ویردیلار اؤلدو!!!
تازا باشا دوشموشدوم اوشاقلار مرتضی مرادپورون دونیادان ……..سینی سانمیشدیلار، اونلارا باخیب:
_یوخ بالا او مرتضی یوخ کی! اورمییه ده کی مرتضی گئدیب آللاهین یانینا!
اوشاقلارا سانکی دونیانی وئرمیشدین آتیلیب دوشوب سئوینیب شوکور ائلییردیلر. آخی دونیادان گئدن مرتضی آنالارینین عمی نوه سی ایدی، زنداندا اولان مرتضی آتالارینین عمی نوه سی!
مرتضی آراز ایله دنیز سنین ساغلام قاییتماغینی گؤزلویورلر. لطفا بیزی بوندان آرتیق اوزمه لطفا…
