یازان: سارا طوری

رسیم: ‌اولدوز طهماسب‌پور

سولماز یئنه ده کوچه ده اوتورموش، الین اوزونه قویوب باخیردی. اوردا اوچوشان یئل‌پنک‌لرین هامیسی گؤزل بویالارییلا سولمازین گؤزلرین قاماشدیریردی. قیزجیغاز،  بو شیرین عالمده ایکن، بیردن- بیره گؤیدن بیر نایلون تورباسی فیرلانیب آیاغینین دیبینه دوشدو.

وای! اوشاقلار بیلیرسیز نه اولدو؟ توربانین ایچیندن بیر سیزیلتی سس گلیردی:

-منه یاردیم ائت! منی قورتار بوردان، تئز اول ایندیجه بوغولارام!

بئله¬جه هایلی-کویلو چیرپینیردی. سولماز تئز الین اوزادیب توربانی گؤتوروب، آغزین آچان کیمی گؤردو بیرگؤزل کپنک نایلونون ایچینده چابالاییر... الین اوزالدیب کپنه‌یی گؤتورمک ایسته‌دی. آمما کپنک، نیسگلی گؤرکمله، ایچین چکرک

- قانادیم سینیب، جانیم آغرییر یاواش اول یولداش!

سولماز:

-قانادین ندن سینیب آخی؟ هله بو توربادا نه ایشین وار؟! - دئیه سوروشدو.

کپنک سیزیلدیاراق:

-چؤلده بوتون گول‌چیچکلر، بؤجکلر، هابئله بیزلر ده جانیمیز چوخ اینجییب. هله نفس ده چکه بیلمیریک. تئزاول! تئزاول! دورگل بیر باخ گؤر نه‌لر اولوب. بیزهامیمیز آزقالیریق اؤلک. گل قورتار بیزی، نواولار؟!- دئیب اوفولدادی. سولماز، کپنه‌یین سؤزلرینه اوزوله¬رک، اونونلا بیرگه تلسیک چمنلره ساری قاچدی...

اوشاقلار! سیزجه، گؤره‌سن سولماز چؤلده نه‌لر ایله قارشیلاشدی؟ گلین بالاجا قیزیمیزلا بیرلیکده گئدیب گؤرک اوردا نه‌لر اولوب، منیم یاخشی بالالاریم!

چؤل- چمنده هر زاد چوخ غوصه‌لی ایدی. آغلاماق، سیزیلتی سسی هنده‌وری بوروموشدور. واه!... واه!... اوردا هر یان کیرلی‌دیر. گؤرونور چؤلده بوتون اوتلارین، آغاجلارین، گوللرین ده اوستو زیبیل‌لر ایله اؤرتولموشدور. بالاجا قوشلار، بؤجکلرین ده اوستوباشلاری بولاشمیشدیر. زیر- زیبیل اونلارین اوز- گؤزلرین گیزله‌تمیشدیر اؤزنده.

سولماز گؤردو یازیق گوللرین نفسی چیخمیر. هامیسی اؤسکورورلر... توربا- توربا نایلونلار؛ چیپس- پفک- کیک- شوکولات قابیقلاری اونلاری آز قالیر بوغا. هله یاشیل یارپاقلارین دا ازیب. نوشابه- سو قابلاری بوش دیغیرلانمیش، یا دا بوراخیلمیش اورالارا. کیرلی توربالار بؤجکلر، هم ده بال آریلاری‌نین یووالارینین آغزین توتوب، او بالاجالار یووالارینا گیره بیلمیرلر. هله آرادا بیر نئچه‌سی ده بو توربالارین ایچینه دوشوب چابالاییرلار. اونلاردان قانادی سینانلار دا وار. آغاجلارین بوداقلارینا نایلون ایپلر دولانیب، یازیق بوداقلار اییلیب، بعضی‌لری ده سینیب، آغاجلار یارالانیب، یاردیم ایسته‌ییرلر.

وای!.. نایلون ایپلر او قدر دولانیب آغاجلارین جانینا، بدنلرینی کسیب. سولماز هله آغاجلارین بیرینین باشیندا گؤیرچین جلله‌سین گؤردو. یازیق قوشون یوواسی بؤیوک توربا پاکاتلار ایله قاپاسانیب، بالالاری دا آز قالیر اؤلسون. او قدر تلیس ساپلاری دولانیب جلله‌یه، بالاجا جلله لاخلاییر. آی! آمان! ایندی شوملار دوشر یئره، یووا داغیلار.

بیزیم سئویملی مهریبان قیزیمیز، باشلادی زیبیل‌لری ییغماغا. او هرکسه یاردیم ائتمه‌یی سئویردی. توربالاری، نوشابه قابلارین، هامیسین توپلادی. آمما سولمازین اوستوباشی پیتیراق اولموشدو. هم اللرینه ده تیکانلار باتمیشدی. اینجیسه ده آنجاق او، بالاجا یولداشلارینین جانین قورتارمیشدی. هر بیر توربانی گؤتوردوکجه یئنی بیر نفس وئریردی سئویملی گوله- چمنه.

یاواش- یاواش سولماز اورالاری تمیزله‌دی. هر یان پارلاییردی گؤزلیکدن‌. کپنک‌لر اویناییردی. هر بویادا گوللر آچیردی. چمنلرین یاشیللیغی آرتیردی. قوشلار، بؤجکلر سئوینیردیلر. بال آریلاری سئوینجک باشلادیرلار موم ییغماغا. هریان تمیزلشمیشدی. آمما سولماز یئنه ده یئل پنک آرزیسیندا اللرین قوینونا قویوب قارا- قارا دوشونوردو...

بیردن- بیره کپنک دیللندی: 

-سولماز! سنه نولوب آخی؟ ندن بئله اوزگونسن؟

سولماز حسرتله اوزاقدا اوچوشان یئل پنکلری بارماغیلا گؤستریب, سونرا آه چکیب اوزولر کن : « کاش ! اونلاردان بیریده منیم اولایدی. اوندا شهریمیزده قورولان یاریشا قوشولاردیم. بلکه ده اؤدول قازاناردیم. آمما!»بئله جه نیسکیلی نیسکیلی –دئدیب آردیجا سوسدو.

کپنک ایله یولداشلاری سولمازین سؤزلرین دینله دیکدن سونرا بو قرارا گلدیلراوردان توپلانان نایلونلار - پاکاتلاری ایله گؤرکملی بیر یئل پنک دوزه¬لتسینلر.

نازگوللریم سیزه دئییم. سولماز, گؤیلردن اوچوشان یئل پنکلره باخیرکن, بیردن کپنک یین سس ایله دیسکیندی!..., باخ!آل, بودا سنین . یاغشی ایشلرین اوچون بو بیرهدیه اولسون بیزدن سن سئویملی دوستوموزا.»

[Forwarded from سانجاق درگیسی]

اوردا یاشایان بوتون کپنک لر- آریلار- قاریشقالار- چکیک¬گه¬لر همده آییری بالاجا بؤجکلر هامیسی باشلامیشدیرلاربیرلیکده یئل پنک دوزه¬لتمه یه. هله اوشاقلار! قوشلاردا یوموشاق للک لریندن باغیشلادیرلار یئل پنک یه بلکه اوچاندا گؤیلرده راحات دولانا . هم گوللرهم چمن لربویاسینی ووردولار. « وای!!!چوخ گؤرکملی بؤیوک بیر یئل پنک اولوب بو.» سئوینره¬ک سولماز الین - الینه ووروب هاوایا آتیلیب دوشوب سسلندی : « آهای !...آهای! باخین گؤرون منیم یولداشلاریم نه گؤزل یئل پنک دوزلدیب منه, باخین! باخین! » کوچه نی سولمازین سئوینجک سسی دولدورموشدو. اوردا هامی اوشاقلارآغیزلاری آچیق قالمیش باخیردیلاراوگؤزل یئل پنک یه.

بئله لیکله عزیزلریم, سولمازین یئل پنک -یی شهرین یئل پنک یاریشیندا بیرینجی اولوب اؤدول قازاندی . سولمازایسه آلدیغی اؤدول – دن خسته آناسی نین داوا نسخه لرینی آلماغا گئدرکن چوخ سئوینیردی. آرتیق ماشین جاملارینی تمیزله دیی پارادان قوللک-یی دمیر پولاریلا چوخالسین دئیه اوره یی سیخیلمیردی.

او گؤرکملی یئل پنک ده سئوینج - دن اوچوب گئتدی گؤیلره, بلکه اواوجالاردان باش اوزادیب گؤرسون یئراوزونده چؤللر, پارک- ین چمن لری هابئله خیاوانلار, کوچه لرنه دورومدا.آی اوشاقلار! سیزده باخین گؤرون یاشادیغیز شهرین پارک لاریندا, چیپس - پفک پاکاتلاری,نوشابه قابلاری یاداآیری زیبیللرتؤکولمه ییب می؟

سؤزلوک

یئل پنک : بادبادک

یاریش : مسابقه

بؤجک : حشره

توربا : کیسه

اؤدول : جایزه

هنده ور : اطراف

یاردیم : کمک

پیتیراق : نوعی خار