اؤن سوز: سئچگی و سئچمک، هر توپلوم و میللتین دانیلماز حاققی دیر. بو حاققی الده ائدیب، یارارلانماق اوچون اؤنجه رئکلام آپارماغا آزاد بیر فضا، بوتون دوشونجه لرین یئر آلدیغی بیر سئچیم و دئموکراتیک بیر حکومت و اؤلکه لازیم دیر. بو اؤنجه لیک لر وارسا و وارلیغینا اینانیرساق، سئچگی لره سئچمن یا سئچیلن آدای کیمی قاتیلماق هر بیر انسانین حاققی و گوره وی دیر. باشقا تورلوسو، سئچیمین آنلامی آرادان گئدیر.
بو باشلیقلا کئچمیشده کی سئچگی لری گؤزدن کئچیردیب، میللی حرکتین توتومونو باخیب، الده ائتدیکلریمیزی، آلت اوست ائدرک، گله جک سئچیملرده نئجه داورانماغیمیزا باغلی یازینی سونا چاتدیراراق، قوللوغونوزا سونولاجاق. آرتیرمالییام، بو یازی شخصی و یازارین اؤز دوشونجه سینه باغلی اولدوغوندان دولایی، نقد ائتمه یه آچیق دیر. نقدلری و چئشیتلی دوشونجه لری بیر یئره توپلایاراق، سونراکی یازی لاری یاراتماغا یارارلی اولاجاق.
ایران و سئچیملر: بو گونکو حکومتین وارلیغیندان بری، چوخلو سئچیم یاشانیب، آنجاق آد چکدیگیمیز اؤنجه لیک لرین، هئچ بیری گؤرونمه ییب، سئچیمه قاتیلماق ایسته ین نظاما باغلی بیریسی اولمالیدیر. یعنی چئشیتلی و مخالیف دوشونجه لرین بو سئچیملرده یئری یوخدور. بو دوروم غیر فارس و غیرشیعه میللت لر آراسیندا داها آرتیب و چنبر دارالیر.
بئشینجی پارلامئنت سئچگی لرینده یاشانان اولایلارا باخارساق، آزربایجانین ضییالی، سایین دوهتور چهره قانلی، اویلارین چوخونلوغونو قازاناراق، پارلئمان حاققینی قازانماییب، توتساقلانیب، ایشکنجه یه معروض قالدی. بو چیرکین ایشه اعتراض ائدنلر توتساقلانیب، جزالاندیلار.
بو اولای بیر باشلانقیج اولاراق، گله جک سئچیملری ائتکیله ییب، آزربایجانلی لارین و تورک خالقین سئچیملرده آزینلیق اولاراق، اعتراضلارینی گؤستریب و گؤسترمک ده دیلر.
تئهران رژیمی، بو اعتراضلار سون قویماق اوچون، یئنی بیر پیلان اورتایا قویوب، میللتی صاندیق باشینا چکمک ده دیر.
سون زامانلاردا، باتی آزربایجان باشدا اولاراق، تهران حاکمیتی، آزربایجانین تاریخی توپراقلاریندان آیریلان شهرلرده، غیر تورک میللت لری یئر ائتمک پیلانی ایله، توپراقلارین الدن گئتمه سینی قابارداراق، آزربایجان تورک میللتین آراسیندا توپراق الدن گئتمه قورخوسونو یارادیب، میللتی صاندیق باشینا چکیب، پیلانینی یورودور و بو یولدا باشاریلی اولوبلار. حال بوکی همن غیر تورکلرین اؤز توپراقلارینا گؤز آتاندا، نه دورومدا اولدوقلارینی گؤرمک اولور.
توپراق بیز تورک لره هر نده ن اؤنجه گلیر، او اوزدن توپراق اوستونده ریسک ائتمک ایسته مدیگیمیز اوچون، مجبورا، صاندیق باشینا گئدیب، تورک آدای لاری چیخارداراق، چوخونلوق‌اولدوغوموز اثبات ائتمه یه چالیشمیشیق. نه قدر باشاریلی اولموشوق، بیر قونودور، نه قدر اویونجاق اولموشوق باشقا بیر قونو.
نئچه دؤنه سئچیملرین سونوجلارینی قارشیلاشدیریب، نه الده ائتدیگیمیزی آلت اوست ائدرک، اویونجاق اولماغیمیز داها آغیر گؤرونور. سئچیمین دوغرو و یانلیش اولدوغونو آییرتماق اوچون، آلتدا چکدیگیم نده نلره باخدیغیمیزدا فایدا وار.
بیرینجی: صاندیقدان چیخان اویلارین و آدایلارین، گرچکدن میللتین سالدیغی و سئچدیگی اینسانلار اولدوغونا اینانمامیز گرکیر. یعنی هئچ بیر دولاندیریجیلیق و یا ساختاکارلیق (تقلب) اولمادان، سئچیملر سونا چاتیر. اگر بویله دیرسه سئچیملره قاتیلماق ان دوغرو ایشدیر، یوخ اینانماییرساقسا، قاتیلیب اوی وئرمه یین نه آنلامی وار؟
ایکینجی: آدای اولان انسانلار توپلومون ایچیندن قاتیلاراق، بوتون فیکیر آیرینتی لارین قاتیلما حاققی اولوب، آیری سئچکیلیک باش وئرمه دن، فیلترسیز بو سئچیملره قاتیلیبلار. بیز گؤروروک بونون تام ترسی اوز وئریب، فیلتردن کئچمک اوچون نظاما تام باغلی اولاراق، میللت حاققی یوخ، بلکه حکومتین حاققینی ساوونمالیدیلار. اگر بئله دیرسه، بو سئچیملرده ایشتراک ائتمه نین نه آنلامی وار؟
اوچونجو: ایسته دیگیمیز آدایلارین قازاندیقدان سونرا، اؤزگورجه سینه، هئچ باسقی آلتیندا اولمادان ایش گؤرمه حاققینا صاحیب اولوب، میللتلرین مدافیعه سی اولاراق، حاقلارینی ساوونالار. قازانان آدایلارین، نئچه ایللیک باشاریلارینا و گؤردویو ایشلرینه باخاندا، آنجاق بله قربان، اوغورلوق، اؤز قازانج، بوش شعارلار و ... گؤروروک. بو نئچه ایلده هانسی میللت وکیلی، آزربایجانین میللی منافعی اوستونده آتدیم آتیب؟ قیرخ ایلدیر اؤزلری یازدیغی و آند ایچدیگی یاسانین، اون بئشینجی اصلی، هله ده توز باسیر و ایجرایا کئچمیر. بو قدر توهین، تبعیض لر قارشیسیندا هانسی اعتراض پ یا سسلری چیخیب؟ نئجه اولا بیلر مرکزی شهلر گونودگوندن دیرچه لیرلر، بیزسه دالی گئدیریک.
بو اوزدن، سئچیمین دوغرو اولدوغو، دوغرو اینسانلارین قاتیلیب قازانماغی و دوغرو و دوزگون ایش گؤرمه لرینی نه گؤرموشوک، نه ده گؤره جه ییک.
اگر بو گون غیرفارس میللت لرین، اؤزللیکله تورک میللتین ایقتیصادی، کولتوره ل، سیاسی، اجتماعی و ... دوروملاری گئت گئده آغیر وضعیت ده دیر، سئچیم لرین نه قازانجی اولوب بیزلره؟ نه قدر یالان وعده لره اینانیب و اویونا گلرک، صاندیق باشینا گئتمیشیک و گیتمک ایسته ییریک؟ بیر سئری ده اوتوروب ایزله ییب سونوجونو گورک. سیزجه بوندان آغیر دوروم مو اولاجاق؟
میللی و سیاسی فعاللاریمیز مدنی شکیلده چالیشمالارینا راغمن، دوستاقلانیرلار. دیلیمیز تاپدالانیر، میللتیمیزی آلچادیرلار. یئری آلتی و یئر اوستو وارلیقلاریمیز تاراج اولونور، حاق سؤز دانیشاندا، وارلیغیمیزی قوروماق ایسته دیگیمیزده، پانتورک، تجزیه طلب، اجنبی و ... آدلانیریق. سیزجه قاتیلیرساق بونلار آرادان گئده جک می؟ یوخسا قاتیلماساق داها آغیر اولاجاق؟ باخدیغیمیزدا، هر دؤنه دوروموموز کئچمیشدن داها آغیر و دایانیلماز اولوب.
آنجاق بوردا سؤز بوتؤو آزربایجانین توپراقلاریندا گئدیر. اگر قورخوموز باتی آزربایجاندیرسا، سونقور، بیجار، قروه، آستارا، قزوین، همدان، ساوه و ... چوخداندیر آزربایجان آدینی داشیمیرلار آمما هئچ زامان اوردا یاشایانلار، اؤزلرینی آزربایجاندان و تورک خالقیندان آیری گؤرمه ییب لر. اگر قورخوموز توپراق الدن وئرمک دیرسه، اونو الده ائتمه یین یولو، سئچیم و صاندیق دئییل. ده رین دوشونمه میز گرکیر.
جین شارپ، نافرمانی مدنی آدلی کیتابیندا، مدنی شکیلده اعتراضینی گؤسترمه نین یولونو، حکومتین سیزه باغلی اولدوغو زامان یوخ دئمه ییمیز گرکیر. ایستر، سئچگی اولسون، ایستر خیاوانی یورویوش و یا ...
گله جک اینانانلاریندیر.
