سانال اورتام‌دا اولدوغوم زاماندان بری، همیشه بیر قونو بئینیمی مورگه‌نه کیمی بورویوب گمیرمک‌ده‌دیر. بیزیم ایچیمیزده یازیلان یازیلارین سایی‌سی گونو ـ گوندن آرتسا دا، آمما دوغروسو عموم اوخوجولاریمیزین آراسیندا دویغوسال یازیلار داها آرتیق ده‌یرلندیریلیب، تارتیشیلماق‌دادیر. اونونلا دا تحلیلی ـ انتقادی یازیلار حاشیه‌یه گئدرک، بیر دور چورویوب، ایتیب ـ باتیرلار. بو دورومدا عادی اوخوجولارین دویغولارینی سوموروب اونلاردان قیدالانان یازی و یازارلار بیزی تهلوکه‌لی بیر مؤوقعه سوروکله‌ییب آپارا بیلرلر. بو تهلوکه‌لی مؤوقع تضادلاری آرادان قالدیراراق ایچیمیزده بیر «تپه گؤز» بئله بئجردر. نییه‌کی شریعتی دئمیشکن تضاد اولمایان یئرده فیکیر ده اؤله‌جک‌دیر.
البته ایستر ـ ایسته‌مز بو مسئله ناسیونالسم‌ین ماهیتیندن ده ایره‌لی گلیر. ژان بوشلئرین فیکرینجه میللت‌چی‌لیک آخیمیندا اینسانلار اؤز فردیت‌لرینی گئری‌ده بوراخاراق، فردلر جیسم و روحلارینی جمعی آماجلارین قوللوغونا سونورلار. پیسخولوژیک باخیمدان بو فرددن جمعه دوغرو دؤنوشوم فردین تعهوندوندن آسیلی‌دیر. یانی بیرئی جریاندا آیاق توتوب ایره‌لی‌له‌مک ایسته‌ییرسه، تام تعهودلو بیریسی اولمالی‌دیر. بونونلا همن دویغوسال اورتاملا اویغونلاشماق بئریین تعهودونو گؤز اؤنونه سرگی‌له‌ییر.
ادوارد سعید «نشانه‌های روشنفکران» آدلی کیتابیندا بو گیجه‌لکدن قورتولماغی بیر سیرا آیدینلارا تاپیشیریب‌دیر. سؤمورگه‌یه قارشی ووروشان آیدینلار، میللی موباریزه‌ده ایشتراک ائتمه‌لریندن علاوه میللی حرکتلرین تنقیدینی ده اونلارا تکلیف ائدیر. چونکو اوزون ایللر بویو اؤز باغیمسیزلیغینی ایتیریب استعمارا معروض قالان خالق، طبیعی اولاراق سؤمورگه‌نین اؤزللیکلرینی ده ایچلشدیره‌جک‌دیر. اونونلا یئنی جانلار یارادیلیب حرکتی ایسه دئموکراسییه بویاماق اوچون، تنقید آیدینلارین قاچیلماز وظیفه‌لری اولمالی‌دیر.
ا.ت: میللی حرکت‌ده اورتایا چیخان تنقیدی اثرلرین بیری ایواز طاهانین «کیملیک‌چی سیاست باره‌ده پاتولوژیک تئزلر»یدیر. بو اثر اولدوغو کیمی ده‌یرلندیریلیب، اوستونده تارتیشیلمادی. بوندان ساوایی علیرضا اصغزاده‌نین ده «ایران و چالش و تنوع» -راسیست آریانیستی و مبارزات دموکراتیک آدلی کیتابی ایسه ایواز طاهانین اوستده آدینی چکدیییمیز اثری‌نین آلین یازی‌سینا دوچار اولوبدور.
