هر بیر میلتین ان بؤیوک خزینه سی و وارلیغینی تشکیل ائدن فاکتور، او میلتین اینسانی خزینه سی دیر. بو گونکی دونیا اینسان محور بیر دونیا اولاراق، ده یرلندیریلمک ده دیر. ائله بونا گؤره ده گوجلو، دئموکراتیک و مدرن دولتلر بو اینسانی پوتانسیلین اوستونده بؤیوک هزینه لر قویوب و بو پوتانسیلی، عمومون خیدمتینه سونماقدادیر لار. اؤیره تیم و تحصیل سیستئمی بو موضوع دا چوخ بؤیوک رول اویناماقدادیر. چونکی اؤیره تیم و تحصیل سیستئمی بیر میلتین گله جه یینی تعیین ائدن ان اؤنملی سیستئمی تشکیل ائتمک ده دیر. نه قدر تحصیل سیستئمی میلتین کولتورل وارلیغینا خیدمت ائدیب و گوندم اولورسا و اینسانلارین حیاتلارینا آزاد و هدفلی اولاراق یؤن وئریرسه او قدر او میلت بو گلیشمیش دونیادا اؤز آیاغی اوستونده دوروب و دونیا ایله تعاملدا باشاریلی اولاجاقدیر.
کئچمیش یوز ایلین ایچینده کی یئنی تحصیل سیستئمی اؤلکه ده یارانیب دیرسادا ، نه یازیق کی بو تحصیل سیستئمی دیل، کولتور، دوشونجه، ده یر، دونیاگوروشو و یاشام طرزی اولاراق بیز تورکلرله اؤگئی بیر موناسیبتده اولوب و هر زامان بیزی یا گؤرمزدن گله رک یا دا بیزیم وارلیغیمیزی هده له مک له پروقراملاشدیریلمیشدیر. بئله لیک له بو سیستئم عملا بیزه هئچ بیر آیدینلیق باغیشلامادان بیزی داها اؤزوموزدن و معنوی دونیامیزدان اوزاقلاشدیرماقلا مشغول اولموشدور. بونون سونوجو علمی و فنی جهت دن ضعیف و باشاراجاقسیز و دوشونجه و کولتورل باخیمدان باشقالارینا محتاج و اسیر بیر جمعیت له قارشی قارشی یا گلمک ده ییک.
عموما تحصیل سیستئمی بیزده فارس دیلی، ادبیاتی، کولتورو و فارس دونیاسینی منیمسه مک و مرکزچی بیر ذهنیته تابع اولماق اوچون قورولوبدور. بونون بارز اؤرنه یی اییرمی بیرینجی عصرده یاشاماغیمیزا باخمایاراق هله ده جمعیتین انتظاری ساوادلی و کولتورلو بیر شخص دن فارسجانی لهجه سیز دانیشماق و فارسلاشمیش اولماسی دیر. بو ایسه تک الچی و باغلی بیر ذهنیتین بیزه خبرچی سی اولماقلا یاناشی بئله بیر سیستئمین رئال ایش، هنر، دوشونجه و... دونیاسیندا تقلیدچی و صیرف مصرفچی اولان بیر کوتله نین یارانماسیندان خبر وئرمک ده دیر. بئله لیک له بئله بیر تحصیل سیستئمی نین بیز اوچون هئچ نه ارمغان گتیرمه دییی و ترسینه بیزلردن بیر چوخ ده یرلی شئیلرین ده قوپاریب آپارماسینی گؤسترمک ده دیر.
گوجلو، باشاریلی، ائتگیلی، نشاط لی بیر توپلوم اوچون واقعیتلرله باریشیق، آزادلیق و اونون یاراتدیغی مسؤلیت لری درک ائده ن و گونه آیاق اویدورا بیلن عینی حالدا تورک کولتورو و وارلیغینا باغلی بیر تحصیل سیستئمی نین یارانماسی چوخ اؤنملی دیر. بو سیستئمین دوشونجه تمللرینی آتماق و اوزه رینده علمی_نظری اولاراق چالیشماق ایسه متخصص لریمیزین و آیدینلاریمیزین میلی گؤره ولری ساییلماقدادیر.
"علی عزیزی"
