آذوح تشکیلاتین سؤزچوسو امیر مردانی نین Axar.az موصاحیبه‌سین‌دن بیر نئچه بؤلوم
- میللی منفعتلرین و بوتون حاقلارین الده اولونماسینی اؤزوموزه هدف سئچمیشیک. بو، بیزیم مانیفئستیمیزده ده قئید اولونوب. میللتین اؤز موقدداراتینی تعیین ائتمه یولون‌دا حاققینین برپا اولونماسینی ایسته ییریک. موستقیل گونئی آذربایجانا، یاخود دا بوتؤو آذربایجانا نایل اولدوغوموز گونه کیمی الیمیزده اولان بوتون ایمکانلاردان فایدالانماغا چالیشیریق.
- فارس موخالیفتینین الین‌ده اولان مئدیا بیزیم سسیمیزی باتیرماق اوچون دورمادان چالیشیر. آوروپا پارلامئنتینین نماینده‌لری ایله گؤروشه گئتدییمیز زامان معلوم اولدو کی، بیزیم حاققیمیزدا اونلارا دوغرو اولمایان خبرلر چاتدیریلیب. سونرا بیز حاق‌لی اولدوغوموزو اثباتلایا بیلدیک. بوتون بو چتین‌لیکلره باخمایاراق، ایشلریمیزی داوام ائتدیریریک. تورکییه‌ده، شیمالی آذربایجان‌دا موتمادی اولاراق سئمینار و ایجلاسلار تشکیل ائدیریک. بو ایش بیرلییمیزی درینلش‌دیرمک نیتیندییک. همچینین، بعضی تشکیلاتلارلا امکداشلیغیمیز وار. ایران‌دا یاشایان قئیری-فارس میللتلرین تمثیل اولوندوغو قوروملارلا دا دانیشیقلاریمیز اولوب و اونلارلا گله‌جک‌ده امکداش‌لیق قورماغا جهد ائدیریک.
- گونئی آذربایجان‌دا باش توتان آکسییالاردا اؤن سیرادا گنجلر و طلبه‌لردی. طلبه‌لرین بو فعال‌لیغی هر زامان اولوب. گونئی آذربایجان‌لی گنجلرین آکتیولیینی ایران‌دا باش وئره‌ن بوتون اعتراضلاردا گؤره بیلریک. فارس و یا قئیری-فارس میللتلره باخدیغیمیزدا اونلارین اعتراضلارداکی فعال‌لیغی حاقین‌دا بیرمعنالی دانیشماق اولمور. اما آذربایجان‌لیلار، استثناسیز اولاراق، اؤن سیرادادیلار. «تراکتور»اون اویونلارینا اون مینلرله آزارکئش قاتیلیر. اونلار دا میللی شوعارلار سسلندیریر. اویونو ایزله‌یه‌نلرین چوخو گنج و طلبه‌لردیر. فعال‌لیق گؤستردیی اوچون توتولانلار آراسین‌دا طلبه‌لرین سایی چوخ اولور.
- اعتراضلاردا داها چوخ دؤرد طلبیمیزین حیاتا کئچیریلمه‌سینی ایسته ییردیک. بونلار قادین-کیشی برابرلیگی، دینی تولئرانت‌لیق، حاکمیت‌ده تمثیل اولونان بیر قروپ اولیقارخین اؤلکه ثروتلرینی منیم‌سه‌مه‌سینه سون قویماق، قئیری-فارسلارا اولان آیری-سئچکی‌لیک سیاستینین قارشی‌سینی آلماق‌دیر.
- تبریز اونیوئرسیتئتینین طلبه‌سی آیلار حققینین قاتیللرینین نه واخت‌سا جزالاناجیغینا اومید ائدیرسینیزمی؟
- آیلار حققینین قاتیللرینین نه واخت‌سا جزالاندیریلماسی بو رئژیم‌ده مومکون اولمایاجاق. بو، بیرینجی دفعه دئییل و تأسف کی، سونونجو دا اولمایاجاق. بنزر حادثه‌لر چوخ اولوب. حتی قتل تؤره‌دن شخصلر بل‌لی اولسا دا، اونلارا هئچ بیر جزا وئریلمه‌ییب. ۲۰۰۶-جی ایل مای قیامین‌دا بیزیم بیر چوخ شهیدیمیز اولدو. قاتیللری معلوم ایدی، عائله‌لر شیکایت ائدیب، اونلارین جزالاندیرلماسینی ایسته‌دیلر. مجبور قالیب بو ایشلری گؤره‌ن شخصلرین آدلارینی آچیقلادیلار، لاکین جزا وئرمه‌دیلر. دئمه‌لی، بو سیستئم هئچ بیر زامان ایستمیر کی، اؤز آداملارینی موهاکیمه ائتسین. یئری گلن‌ده گنجلرین قاتیللری موکافاتلاندیریلیر و وظیفه‌لرینی آرتیریرلار.
- ایران‌دا سیزین حرکات‌دان ساوایی باشقا هان‌سی طلبه بیرلیکلری وار؟
- ایران‌دا گونئی آذربایجان، تورکمه‌ن، قاشقای، ائله‌جه ده قئیری-فارسلارا و فارسلارا عایید اولان اؤیرنجی بیرلیکلری حاقین‌دا دانیشماق اولار. گونئی آذربایجان، قاشقای و تورکمه‌ن طلبه بیرلیکلری ایله علاقه‌لریمیز داها سیخ‌دیر. بیر چوخ درنکلرده، بیرلیکلرده فعالیت گؤستریریک. بو باره‌ده اطراف‌لی دانیشماق اونلارین حیاتی اوچون تهلوکه‌لی اولا بیلر دئیه، عمومی معلومات وئریرم. بو کاتئقورییادان اولان طلبه بیرلیکلری ایله سیخ علاقه‌میز اولوب و بیر سیرا اوغورلار دا الده ائتمیشیک. قئیری-فارسلارلا علاقه‌لریمیز کئچمیش‌ده نئجه وار ایدی‌سه، یئنه ده داوام ائدیر. اورتاق بیاناتلاریمیز و بیرگه آکسییالارین قورولماسین‌دا ایشبیرلییمیز اولوب. فارس اؤیرنجیلرین قروپلارینا گلینجه، بو اؤیرنجی حرکاتی ۲۰۰۹-جو ایله قدر گوج‌لو ایدی. احمدی‌نژاد حاکمیته گلدیک‌دن سونرا فعالیت‌ده اولان درنک و قروپلاری آغیر باسقیلارا معروض قال‌دیلار. حاضردا قروپ شکلین‌دن داها چوخ فردی فعالیت گؤستریرلر. اونلارلا بیر او قدر ده علاقه‌میز قالماییب.
- گونئی آذربایجان مسئله‌سینین حلی، سویداشلاریمیزین حاقلارینی برپا ائتمه‌سی اوچون نه کیمی آددیملار آتیلمالی‌دیر؟
- گونئی آذربایجان میللی حرکاتین‌دا میللتین سادتی و آزادلیغی بیر قوش کیمی تصویر ائدیلیر. قوشون بیر قانادی گونئی آذربایجان‌دا یاشایان میللی فعاللار، دیگر قانادی ایسه خاریج‌ده یاشایان میللی فعاللاردیر. بو قانادلار گوج‌لو اولمالی‌دیر و بیرگه حرکت ائتمه‌لی‌دیر کی، اوچا بیل‌سین. خاریج‌ده یاشایان فعاللارین ان موهوم وظیفه‌سی لوببی‌چی‌لیک‌دیر.
